Ma eşkenê vacê milletê ke ziwanê xo bikero vinî tim çî yî xo keno vinî. Çike ziwanê miletê ke nasnameyê o miletî yo. Tim miletî pê ziwanê xo yenê naskerdişî.
Serê ziwanê zazakî de tehluke yê ke gird esto. Mîyanê şarê ma kurdan de, mîyanê domananê ma de, xorta nê ma de, kêna nê ma de roj bi roj ziwanê ma tayn yeno qisey kerdişî. Waxte ma qij bî malbatê ma, ma dir her wext kurdî qisey kerdêne. Pîlê ma, ma ra sanikî, deyirî, lorî vatêne û ma zî bi keyf înan goştarî kerdêne û ma ziwanê xo,folklorê xo musayîne.
La nika ez şina keye yê merdimanê xo û ez vînena ke înan torna nê xo dir tena tirkî
qisey kenê. Merdim şaş maneno çike detê min, xalê min û merdimê min ke emrê înan pîl o, tayn tirkî zanê la torna nê xo dir tirkî qisey kenê.
Waxte ez înan ra vana “şima çî rê domananê xo, tornanê xo, veyvanê xo dir tirkî
qisey kenê?” Înan zî min ra vanê “ma seke rê, înan semedê ke kurdî nêzanê ma zî înan dir tirkî qisey kenê.” No cewabê înan ra hûyayîşê min ameyeno. Çike tornê înan yew yan zî di serre yê û domanê ke yew yan zî di serre bo, ti a domanî rê çi ziwan bimusnê o do a ziwanî fam bikero û qisey bikero.
Yew merdimê min ame bi nîşane yê birayê min. No merdimê min bi heşt serrî zewecîya yo û di domana ey estê. Domanê ke çar serre yo, domanê ke ey zî yew serre yo. Domanê ke çar serre yo ziwanê ey tayn giran o û semedê no rewşî ey zî
domanê xo berd bi verê doktorî. Ez zî şîya verê no merdimê xo, ma persê yewbînan kerd û min ey ra vat:
- To seke, doktorî semedê rewşe lacê to, to ra vat çi?
- Doktor vaco çi, vat semedê ke ma keye yê xo de lacê xo dir zazakî qisey kenê
wîna bî yo.
- Çi ra, çi eleqe yê zazakî est o?
- Çike ma lacê xo dir zazakî qisey kenê la waxte lacê min vecê no teber û şino verê embazanê xo înan dir tirkî qisey keno. Na rewşî ra mezgê ey gineno tê ro. Hem zazakî nêmuseno hem zî tirkî nêmuseno û ziwanê ey zî beno giran.
Doktorî vat: ‘Eke şima hes nêkenê ziwanê lacê to bibo giran ey dir tena tirkî qisey bikerê.’
Waxte merdimê min, min ra wîna va ez mat menda. Çi ra tena tirkî xeberî bi do, çi ra zazakî xeberî nê do? Çike gore yê no doktorî ziwanê ma kurdî mûhîm nî yo. Beno ke hes keno kurdî ziwanê xo, bikerê xo vîra. Ewro dewanê Kurdistanî de zî “Ana Okul” î estê. Domanê ma çar - panc serre yî şinê no mekteban. No mekteban de ziwanê tirkî musayenê û ziwanê xo kenê xo vîra. Televîzyona nê tirkan de zey Pepe, Keloglan, Calilou, Ari Maya, Nane ile Limonî programî estê.
Ez bawer kena no programê domanan serê domanan de zaf tesîr kenê û semedê ke domanê kurdan qijî tî ra tirkî bimusê û ziwanê xo bikerê xo vîra no programî televîzyonan de vecenê. Ma nika no xûsusî de zaf diqat nêkenê la tîya ra vîst - vîst û panc serrî dima ra domanê ke zazakî zanê do zaf tayn bimanê. Beno ke ma semedê cûyayîşê ziwanê xo erey bimanê.
Ez vana qey nika Kurdistan de zaf asîmîlasyonê ke gird est o û no asîmîlasyon
zî zaf şarê Kurdistanî de tesîr ke no la no xûsusî de kemasî ma kurdan zaf esto. Ganî ma her tim malbata xo, embazanê xo, domananê xo, waştî ye xo dir kurdî xeberî bi dê. Nika kitabê kurdî zî çap benê, televîzyonê ma zî estê. Keye yê xo de kanalan ê kurdî a kerê û kîtabgehê xo de zî kîtabî kurdî wa bi bê.
Xo ra ziwanê dayî, ziwane kurdi de hîrê mekteb abîyê. Wa şarê ma hem mektebe tirk boykot bikero- hem zî tutanê xo bişirawo mektebe kurdi. Ziwanê xo rê dîqat bikerê, çike ziwan nasnameyê to yo. Eke ziwanê to çînîbo ti zî çînî yê.