Melle Akyuz’î vist vîrî ke, Medîne de zî, çormeyê sûk de xendekî amey kiniten û ebi nay pawitenê rewa ame kerdin.
Bado ke Kurdistan de îdareyê xoser amey îlankerdin, dewlet destpa qetlîaman kerd, doman, cenî, cayê tarixî û îbadetî bî hedefê tanq û topan. Verra tîmanê teybet yê ke xo zey eskerê Îslamiyet vînenê û bi nameyê Tîmê Esedûllah hêrişê sûkanê Kurdan kenê nêrazîbiyenê alîmanê dînî ramenê.
Keyeyan de pawitena xo bigîrê
Melle Abdûrrahman Akyuz’î vist vîrî ke, eleqeyê Îslamiyet’a ewroyî bi Îslamiyeta raştî çinyo û hayr ant qiseyanê Hz. Muhammed’î yê ‘Keyeyanê xo de pawitena xo bigîrê’ ser. Akyuz’î vist vîrî ke, Îslamiyet de otorîteriya jew merdimî, serdestî û vatişanê corîn rê ca çinyo û wina va: “Îslamiyet ca dayo cuwyayişê sivîl, cematbiyen û rihê piyayî yê şarî.
Xendekê Medîne
Melle Abdûrrahman Akyuz’î hayr ant xendekanê Medîne ser û wina dewam kerd: “Medîne de, serva ke homet zerar nêvîno, çar koşeyanê sûkî de, bi kinitişê xendekan, pawitişê rewa ame ramiten. No ebi nameyê ‘Herbê Xendekan’ kewt tarixê Îslamiyetî de ca gêno. Serva pawitenê can û malî kinitişê xendekan rewa yo. Akyuz’î aşkere kerd ke, xendekî nînê maneya hêrişkerdin, yenê maneya pawitenê cewherî. Akyuz’î vist vîrî ke, Hz. Adem ra heta Îslamiyet, pêrokîn dîn-ol’an de 5 emelê esasî estê: Mudafayê neslî, muhafezayê can û mal û dînî. Xendekî zî serva pawitena nê emelanê.
Jû nîjad, ser a bîn de serdest niya
Melle Akyuz’î aşkere kerd ke, hewcedariyê Îslamiyet bi pere, menfeat, îxtidar û nîjadî çinyo û vist vîrî ke îxtidara nikayî Îslamîyet serva menfeatanê xo şixûlnena. Akyûz’î diyar kerd ke, wextanê peynî de, ravêrberdişê ‘Îslamiyetê Tirk, Îslamiyetê Ereb, Îslamiyetê Fers’ raşn niyê û zerar danê Îslamiyet. Akyuz’î ard ziwan ke, ayetê Qûran’î de yeno vaten ke, jû nîjad ser ya bîn de serdest niya. Melle Abdûrrahman Akyuz’î da zoneyene ke, xeyrê tewr gird, hikûmdar û îxtidarê zûrkeran ra vajiyo ‘ti zûrkerê’ yo û va, îbadetê tewr gird, verra zilmê zalim û dîktatoran de vetişo.
Melle Akyuz’î hayr ant kiştişê domanan ser û aşkere kerd ke, eleqeyê kiştişê doman-qijan ebi dînî çinyo û ina va: “Herbî de, doman, cenî, dayikî, nêweşî, kal û pîrî bêsûcî yê. Hêrişkerdişê înan, înkarkerdişê rihê Îslamiyet o. Serva serkewtişê xo, welişnayiş û veşnayişê her çî, goreyê exlaqê Îslamiyet niyo.
Melle Abdûrrahman Akyuz’î da zonayene ke, Îslamiyet ebi dewrê Mûaviye ra piya bî îxtidar û wina va: “Welatê Îslam, bi maskeyê ‘Îslamiyet’ nîjadperwerî kenê. Kes nêşeno vajo ke, Tirkiye xîzmetê Îslamiyet kena. Esasî de wazenê Tirkbiyîn û nîjadê Tirk serdest bikerê.
Eke pêxember bîro, Îslamiyeta ewroyî nêsilasneno
Akyûz’î va: “Eke ewro Pêxemberê ma bîro û Îslamiyeta ewroyî bivîno, nêsilasneno. Hewl danê însanan serva sîstema xo empoze bikerê, Îslamiyet şixûlnenê. La Îslamiyet de bêîradekerdiş rê ca çinyo.
ANF/AMED
Verra Homa’yî şîrq virazenî
Îdarekarê Komeleya Cigêrayişê Komelkî Îbrahîm Akyol û Azayê Kongreya Îslama Demokratîk (DÎK) Ayetullah Kûran’î zî babetê konseptê herb yê AKP û erdan de viradayişê cenazeyan rê nêrazîbiyen damusnay.
Îbrahîm Akyol’î ciresna ke Îslamiyet, dîn o ke merdimî ra muhîmî dano yo û hayr ant erdî de mayişê cenazeyan ser: “No qet nîno qebulkerdiş. Erdî ra kaşkerdişê cenazeyan û teslîmnêkerdişê malbatanê ci, cayê ci ti dînî de çinyo. Akyol’î va, semedê îxtidaro ke xo sey misilman dasilasneno, çîyo ke dej dano merdimî yo.
Ayetullah Kuran’î zî dîyar kerd ke Îslamîyet verra merdeyan bêhirmetî qebul nêkeno û wina vat: “Bêhirmetiya ke merdeyan rê yeno kerdiş, heme merdimatî ra yeno kerdiş.“
Kuran’î va: „Wexto ke cihuyekî mireno û cenazeya ci yeno wedarnayîş, Pêxember vernîya cenazeye de werzeno pay. Wexto ke, ci rê vanê; ‘no cihu yo’, Pêxember cewabê ‘no yew merdim o’ dano. Dînê Îslamiyetî de kiştiş û herb çinyo. La eke herb û merdiş bîyo zî Îslamîyet exlaqî vernîyaz keno. No semedî ra nê misilman niyê.”
Mela Mehmet Ateş’î zî qiseyanê xo de vist vîrî ke, yê ke xo ra vanê misilman û merdimatî ra zilm kenî, ê verra Heq-Homa’yî şîrq virazenî.
DÎHA/EDENA