MÛRAT KUSEYRÎ / ANF/STOKHOLM
Roja ke prosesê referandûmî ameyo destpêkerdiş ra nata, cepheyo ke referandûm de vano nê, her ke şono beno hîra. Her roje hetêk seba çi do vajo nê, aşkere keno. Nînan ra yewe zî Endamê Heyetê Îdarekarî yê Konfederasyonê Yewîya Elewîyan yê Ewropa û hunermend Alî Çagan o. Alî Çaganî vînayîşê xo ard ziwan. Hunermend Alî Çaganî va ‘Erdogan hîna zaf selahîyet wazeno. AKP problemo ke 15 serran de nêşêna çareser bikero, gelo do bi sîstemê Serekî çareser bikero?’ û qiseykerdişê xo wina domna: “No bedilnayîşo ke qanûno bingeyî de yeno viraştiş, dengeyo ke mabênê dadgeh, qanûn viraştiş û caardişî de esto, wedarneno. Eke qanûno bingeyî yo newe bêro qebulkerdiş, o wext yê ke bibo Serekkomar do zirar bido welat û şarî.”
Ma qebul nîkenî
Çaganî dewamê qiseykerdişê xo de wina va: “Erdogan mîyanê 15 serran de çend reyan dîyar kerdo ke o goreyê qanûn û qanûno bingeyî hereket nêkeno. Ganî çîyo ke Erdogan wazeno bikero, baş bêro dîyayîş. Erdogan wazeno welat tena bi sereyê xo îdare bikero. Goreyê mi referandûm de do azadî û koletî bêro tercîhkerdiş. Yê ke ferqê nêyî de nîyî do vajî ya, labelê ma bi xo koletî qebul nêkenî û seba cuyêka başe ma vanî nê. AKP û Erdogan seba ke nêeşkenî çîyêk vajî, yê ke vajî nê sey terorîst îlan kenî. Ez zî vana ke DAIŞ û El Nusra vanî ya. Ganî her kes baş bifikirîyo; çimkî vatişê ‘ya’ yeno manaya qebulkerdişê koletîye.”
Wa elewîyî vajî nê
Çaganî peynîye de va ‘hîna qanûno bingeyî yo newe nêameyo qebulkerdiş, Cemxaneyî yenî rijnayîş. Nika Tirkîya de 400 Cemxaneyî estî. Nê Cemxaneyî tena bi vatişêk eşkîyenî bêrî padayîş. Ewro cayê ke elewîyî tede cuyenî, ê cayan de bextwaştoxî yenî bicakerdiş. Wazenî elewîyan surgin bikerî. Ma do no qanûno bingeyî yeno çi mana, merdiman ra vajî. Qanûno bingeyî yo newe tena seba elewîyan nê, seba heme şar, bawerî û kedkaran beno problem. Eke bêro qebulkerdiş, o wext ewleyîya ti kesî nêmanena. Ez veng dana kesê ke koletî qebul nêkenî; wa vajî nê.”