HABÎBE EREN / DUYGU EROL / ANQARA
8ê êlule de mehkemeya Hetkara Hemserekîya HDPyî Aysel Tugluke û Parlamentera HDPyî ya Colemêrgî Selma Irmake estbîye. Mehkemeyê her dîyan zî taloqê tarîxêko erey bîyî.
Babete ser o Parlamentera HDPyî ya Sêrtî Besîme Koncaye qisey kerde. Koncaye dîyar kerde ke ya bi xo zî beşdarê mehkemeya Tugluke bîya û wina dewam kerde: “Dozgerî bi xo mehkeme de îdîaname de problemê kurd do senîn bêro çareserkerdiş û demokratîkbîyayîşê Tirkîya ser o nuştbî. Kombîyayîş û çalakîyê KCDyî sey suc ameyî vernîya ma. No zî ecizîya sîyasetê Tirkîya nîşanê ma dano.”
Koncaye va ‘mehkemeyê Irmake û Tugluke taloqê tarîxêko erey bî’ û wina dewam kerde: “Irmake û Tugluke seba demokratîkbîyayîşê Tirkîya zaf kede dayî. Dewlete neheqî û bêedaletî de israr kena. Nika çîyê ke Tirkîya de benî, seba ameyoxa Tirkîya tehluke yî. Ma prosesêko her kes raştê şîddetî yeno de cuyenî. Tewr peynî Samsun de karkerî raştê hêrişî ameyî û Perîhan Akine ameye qetilkerdiş. Reyna Wesayîtê Bêmerdimî yê Sîlehinî (SÎHA) hêrişê sîvîlan kerdî. Kesê ke destek nêdanî îqtîdarî heme raştê hêrişî yenî. Hemserek û parlamenterê ma zî prosesêko winasî de esîr yenî tepiştiş. Nika xebatêka ma ya cinîyan zî esta. Ma do seba hemînan têkoşîn bidî.”