Parlamentera HDPyî ya Stenbolî Pervîn Buldane derheqê prosesê referandûmî de qisey kerde û wina va: “Emrê AKPyî do referandûmî ra dima biqedîyo.”
Pêşnîyazê bedilnayîşê qanûno bingeyî munaqeşeyanê girdan ra dima Meclîs ra derbaz bî û erşawîya Serekkomar Erdoganî ver û dima ra do prosesê referandûmî dest pêbikero. Ame vatiş ke Erdogan do 40 bajaran de mîtînganê girdan bivirazo. Pêşnîyazo ke mîyanê şarî de sey felaketî yeno dîyayîş, vera nê pêşnîyazî de şar zî dest bi rêxistinbîyayîşî kerdo. Babete ser o Parlamentera HDPyî ya Stenbolî û Wekîla Serekîya Meclîsî Pervîn Buldane qisey kerde.Buldane va ‘7ê hezîrane de wexto ke HDPyî berajê weçînayîşî derbaz kerd û AKPyî bi konseptê şerî Kurdistan de bajaran rijna û xeylê merdiman qetil kerd. O wextî kurdî bîyî şahidê pelçiqîyayîşê erjanê xo. Şarê kurd vera rijîyayîşê goristan û taxan de verdayîşê cenazeyanê xo de ameyî têhet û wayîrê ruhê xoverdayîşî vejîya. Her çiqas ke her roj tewqîfkerdişî kêmî nêbenî zî do şarê kurd wayîrê sindoqanê xo bivejîyo. Şarê kurd do seba wayîrvejîyayîşê sindoqanê xo heme çî bikero. Eke ma baş bixebetyî, do sindoqan ra hîna zêde nê bivejîyo.”
Reyna kaos vejîya
Buldane dewamê qiseykerdişê xo de wina va: “Şar bi hawayo baş zano ke konseptê şerî senî kewt dewre. Ma bawer kenî ke şar hukmato ke înan rê zext û tedayî rewa vîneno, seba yewna rey nêbo hukmat, çi destê înan ra bêro, do bikerî. Tîya de wezîfe keweno ser milê ma û ganî ma şarî rêxistine bikerî. AKP vatêne ‘ya şima 400 parlamenteran danî, ma yan zî kaos vejîyeno’. 400 parlamenterî nêdîyayî û kaos vejîya. Weçînayîşê 1ê teşrîna verêne de bi kaos û şîddetî reyde ma ra reyî girewtî. Labelê dima ra çîyêk nêbedilîya; kaos reyna dewam kerd. Kurdî referandûmî ra ver zî ameyênê qetilkerdiş û erzîyayênê hepisxaneyan. Eke referandûmî de nê bivejîyo, o wext do şert û mercê qanûno bingeyî yo newe bivejîyo raste û şîddet û zextî peynî bibî. Cok ra muhîmîya referandûmî seba kurdan tarîxî ya. ”
‘Nê’ aver de yo
Buldane vist vîrî ke 'Tirkîya nika hem Rojhelato Mîyanên de û hem zî Ewropa de mîyanê krîzêk de ya' û wina dewam kerde: "No krîz tena hetê sîyasî de nîyo, hetê ekonomîk û sosyal de yo zî. Eke referandûmî de ya bivejîyo do krîzî bidomyî. Çimkî heme selahîyatî dîyenî kesêk. Cok ra ya ganî hetê kaos û ‘ya’ de bibî yan zî hetê proseso ke azadî û aştî bêro xelqkerdiş. Nê 2 reyan ra rayîrêk bêro tercîhkerdiş. Nika bi mîlyonan mexdurî estî, nêyî zî netîceyê polîtîkayanê şaş yê AKPyî de vejîyayî orte. Nê mexdurîyetî do sindoqan de tesîrê xo bikerî. Anketê ke yenî viraştiş de nika nê aver de yo. No zî Erdoganî ser de tesîrêko nêbaş kerdo. Emrê AKPyî do referandûmî ra dima biqedîyo. No seba Tirkîya do çîyêko baş bibo.”
HULYA EMEÇ / ANF / AMED