Qetlîamê Enfal ke 1986 de destpa kerd heta 1989 dewam kerd. Qetlîam 6 heremanê başûrê Kurdistan de, 8 merheleyana amey virastene. Na qetlîam hetê gurekarê Saddam Huseyîn, ALî Hasan bi namê xo yê bîn a Aliyê Kîmyewî ra virajiya. Tertele Enfal de 182 hezar kurdî weşiya xo kerdê vîndî. Mavênê ci de cenî û domanan ra piya 1 mîlyon ra jede kurdî hardanê xo caverdayî. 4 hazar dew, 2 hazar mektebî, 27 cayê îtîqat yê Asurî amey vesnayene, ya kî riznayene.
Gazê kîmyewî şixulnayî
Rejîma Baas gazanê kîmyewî est 250 sûke û dewe ser. Serestîsê tewr pîl 16ê Adare 1988 de verva Helepçe virajiya. 5 hazar kes weşiya xo kerdî vîndî, 10 hazar ra jede kes kî dirvetin mend. Eke a roze Halebçe de sîliyî mêvoriyene, biyene ke 75 hazar kes weşiya xo kerdene vîndî, kes ci ra nêxeleşiyene. Kesê ke besekerd na serestîs ra rema, bêvesan, bêtesan hardenê xo sero restê şîndorenê bi mayinan, bi telan.
Tertele Enfal de teyna însanî nê, teyr-tûr, dar-ber kî merdî. Derheqê weşiye de çik esto, reça xo hard serra ame estarnayene. Jê her demî dugelê Rojawa jenosîdê Kurdistan rê bêveng mendî. Onca nî gazê kîmyewî kî hetê înan ra ameyî rûtene. Qetlîamê Halebçe bi terteleyê Enfal a ameyî bî qedînayene. Peyê xo de mavênê honde serran de deze de giran verda.
Endî wextê qetlîaman qediya
Tertelê ’38 yê Dersim de kî des hezarî kes ameybî qir kerdene. Komara Tirkîya bi ‘herekatê pakkerdisî’ est Dersim ser û sûk çarna gola gonîn. Domanê ke hona pîzeyê maya xo de bî singû kerdî. Welatijan şikeft û keyeyan de bi çekê kîmyewî axû kerdî. Yê ke pey de mendî sirgûnê cayanê bîn kerdî. Hona kî bi hezaran çênekê ke o wextî girotiyayî vindî yê. Kamcî lete beno wa bibo, kurdan tim û tim eynî qederî bare kerdî, raştê eynî polîtîkayanê înkar û îmha ameyî. La nika endî qederê kurdan vurniya. Bi Hereketê Serbestî yê Kurd û bi Xopawitişê Cewherî endî kurdî qirkerdiş û înkarî rê vanê nê, serva nay danê piro.
NAVENDÊ XEBERAN