Bado ke, 19ê Tîrmeh 2012 de Şoreşê Rojawa destpa kerd, dewleta Tirk zî kewt alarm. Çike çiyekê winayîn serva Tirkiye xêzkerdişê ‘xeta sûr’î bi. Xo ra, dewleta Tirk Kurdan ra eleqedar her çî zey ‘xeta sûr’ vînena.
Şoreşa Rojawa pêrokîn hewnê sermiyananê dewlet berd, hesab û xeyalê ci yê neo-osmanî xeripna. Çike sîstemo ke Rojawa de roniyeno, dûştê rejîmanê netew-dewletan o û ser erjê demokrasî û serbestî de înşa beno. Serkewtişê no sîstemî, yeno maneya binkewtişê rejîmanê netew-dewletan. No serva Tirkiye talokeyê sifteyin o. Herzewbîn hardê Rojawa û Sûriye de xêlê şar û kamiyê ciya piya cuwyenê û serkewtişê sîstemê xoseriya demokratîk îfade kenê. Tirkiye pêhetameyiş û piyacuwyayişê şaran ra tersena. Çike no jew, do him Tirkiye de û him zî Rojhelatê Miyanî de bibo model. Herzewbîn hetê jeo-cografîk de zî Tirkiye nêwazena xeta Heleb û Dîlok ya stratejîk vinî bikero.
Derheqê Rojawa de xeylê menfeat û hedefê Tirkiye estê. Cok ra, no çihar serriyo, serva verîgirotişê sîstema xoser yê Rojawa çi destê ci ra ame ey kerd. Paşt da hîzbanê çete û înan rişt rojawa ser. Nê çeteyan xêlê komkiştenê bi gonîn viraştî. Xo ra herkes bi şahîdê qirkerdenanê, çeteyanê zey DAIŞ, El-Nusra ûsb. Çiyo ke wazena vaja, nê pêrokîn kerdenî bi destegê dewleta Tirk de bî. Tirkiye bi hezaran çeteyî wayir kerd û perwerde da. Yê ke bî dirbetin ard tedawî kerd. Bi desan TIR’î cebilxane rişt çeteyan rê. Dêrik ra heta Kobanê, xeta sînor de êrişê Rojawayijan kerd. Sermiyanê dewlet yê ke DAIŞ zey hizbê terorîst nêvînenê û vanê ‘domanê bi hêrsî’, serva ke PYD dinya de terorîze bikerê her çî kenê.
Rexmê nê pêrokîn êriş û hewldayenan dewlet nêşa verniya Şoreşê Rojawa bigîro. Quwetê zey QSD, YPG, YPJ, Ceyş-El Sûwar operasyonê xelesnayişê hardê Rojawa ramenê. Koalîsyonê Mavênneteweyî zî paşt dano nê operasyonan. Vera nê ravêrşiyayişan dewleta Tirk kewta tengiyekê xorîn û biya hêrs. Jew sebebê êrişkerdişê Cizîr, Sûr û cayanê bîn yê Vakûr zî heyfgirotişê Rojawa yo. AKP ya ke destê ci nêreseno Rojawa zerreyê welatî de bi wehşiyane êrişê Kurdan kena.
Dewleta Tirk nika zî, serva mudaxaleyê Sûriye û Rojawa bikero pey behaneyan de ya. Teqînayişê peynî yê Enqera zî leteyê no konseptî yo. Xeberê ke veriya teqînayişî, çapemeniya Tirkiye de amey servîs kerdin îşaretê no konseptî yê. Bi rojano çapemeniya Tirkiye manşetan ra xeberê ‘YPGyijî serva êrişî ameyê Tirkiye’ dana. Çiyo mihîm noyo ke, dewleta ke, bi aşman faîlê qetlîama Enqera yê 10ê Cotmeng yê 2015î nê dî, kamiya êrişkarê teqînayişa Enqera desinde dî û aşkere kerd. Sermiyanê corîn yê dewlet, bê ke destanê ci de delîl û belgeyî bibê, teqînayiş ra PYD mesûl girot û destpa tehdîdan kerd. Rexmo ke PYD û YPG aşkere kerd ke, êriş hetê înan nêviraziya, la hikûmet tehdît û îdiayanê xo de israr kena. Hikûmet bi na teqînayiş hewl dana ke, PYD hedef damusno û qada mavênneteweyî de krîmînalîze bikero û ser na biyayiş destegê NATO, Jûbiyena Awrûpa, Amerîka ûsb. bigîro. La kes emelê îdiayanê Tirkiye nêkeno û goş nêdano zûriyanê ci.
Teqînayişa Enqera qeydê veng yê kombiyayişa nimite yê 27ê Adar 2014î ard mi vîrî. Kombiyayiş hetê kesê ke zîrweyê dewlet de yê, derheqê viraştişê jew senaryoyê mudaxalekerdişê Sûriye de viraziya. Wezîrê Karê teber (yê o demî) Ahmet Davûtloglû, musteşarê MÎT Hakan Fîdan, Musteşarê Karê Teber Ferîdûn Sînîrlîoglû û Orgeneral Yaşar Guler ke kombiyayiş de qisey kenê, hadreyînê senaryoyê mudaxale virazenê. Kombiyayiş de Hakan Fîdan vano ke, ‘eke hewce bikero MÎT şeno şiro kişta Tirkiye ra 8 fuzeyî bierzo qûwetanê Tirkiye, Turbeyê Şax Suleyman, bi nay êşkenime sebebê herb hadre bikerime”.
Pêrokîn vatiş, belge û kerdenî damusnenê ke, teqînayiş hetê PYD, ya zî YPG nêviraziyayo. Xo ra malbata Necar ke sûka Rojawa Amûde de nişenê ro, aşkere kerdî ke, jew keso bi nameyê Salîh Necar ke serra 1992 de ameyo dinya Amûde de çinyo. Eke raştî teqînayiş hetê YPG ameyo viraşten se, ganî merdim tenya silamî bikero û kulika xo vejo. Teqînayiş hetê kamî viraziya hona aşkere niyo, la no qorî zî dewleta Tirk îdia û zûriyanê xo de çerx kerd. Jû îdiaya bîn yê kûlusê Enqera: Goreyo ke ma aşnawito, homara eskerê ke teqînayiş de weşiya xo kerdî vinî û bî dirbetin hona vêşî yê û yenê nimiten.