OLVA HAC MENSUR/NESRÎN ALÎ ANHA/HESEKÊ Bi nameyê Ehmed Hemzeyî de kesêk kel-melê ke rew a rew nînî dîyayene dikanê xo de arê dayo û dikanêkê entîke pê ardo. Entîkeyê ke her yewê ci wayîrê hîkayeyêka cîya yî, xo reyde tarîxêk zî kirişenî roja ma ya ewroyî. Hemze dîyar keno ke o aşiqê kulturê kurdan o û eserê hunerî yê destan ra zaf hes keno. Cok ra Hemze verê xo dayo pawitişê kulturê kurdî. Hemzeyî fam kerdo ke zext û tedayê nîjadperestî hewl danî ke kulturê kurdî çinî bikerî. Hemzeyî na çarçewa de nizdîyê 5 serrî çar parçeyê Kurdistanî ra entîkeyê kurdî arê dayî û dikanê xo de ardî pêser. Bitaybetî kel-melê ke cografyaya Kurdistanî de yenî xelq kerdene, dikan de arê dayî. Dikanê Hemzeyî maneno keyeyê kurdan yê kehenî. Dikan de utîyê komirênî, fincan, destar, kilîm û tisbêhê kehenî estî. Sîstemê dagîrkerî ke Rojhelato Mîyanên de hakim o, şar û kulturê herême hedef gênî. Kesê ke sey Ehmed Hemzeyî no het de hesas î, hewl danî vera nê sîstemî de erjê ortaxî yê merdimîye bipawî.