Endamê Konseyê Caardişî yê Koma Komelanê Kurdistanî (KCK) Zubeyîr Aydarî derheqê weçînayîşê parlamenter û serekkomarîye yê 24ê Hezîrane ser o qisey kerd û vînayîşê xo ard ziwan. Aydarî va ‘nizdîbîyayîşê Erdoganî yê kurdan bi hawayo înkar û îmha yo’ û wina domna: “Hêriş û dagîrkerîya Cizîr, Sûr, Efrîn û Başûrê Kurdistanî dişmenîya Erdoganî nîşan danî. Ez veng dana heme kurd û hetanê demokratîkan ke wa 24ê Hezîrane de destek bidî HDP.” Aydarî dewamê qiseykerdişê xo de wina va: “AKP zî dewamê sîstemê dewleta klasîke yo. Cok ra o zî domnayîşê polîtîkaya ‘kurd înkar bike, bêveng bike, yê ke veng vet zî bitepisne’ esas gêno. Çimkî goreyê AKPyî problemê kurdî çin o. Xora wexto ke AKP amebi îqtîdar, vatbi ‘Eke şima nêfikirye, problemê kurdî çin o.” Ganî herkes wayîrê HDPyî bivejîyo Aydarî qala muhîmîya weçînayîşê 24ê Hezîrane kerd û wina va: “Eke îttîfaqê AKP û MHPyî qezenç bikero, rewşa Tirkîya ewro ra giranêr bena. No het de eke muxalefet tay dîqet bikero û wayîrê sindoqan bivejîyo, no îqtîdar ra xelas beno. Ganî kurdî polîtîkaya qetlîyamî, hêrişê Efrînî û dagîrkerîya Başûrê Kurdistanî bivindarno. Seba peynîya dîktatorîya 16 serran ganî herkes wayîrê HDPyî bivejîyo. Goreyê mi do weçînayîşê 7ê Hezîrane ra zêdeyêr rayî bivejyî. Bitaybetî teberê welatî de potansîyelêko gird yê rayan esto. Cok ra ganî herkes bi nê zanayîşî şêrî sindoqan ser û raya xo bikar bîyaro.” ANF / BRUKSEL