HÎVDA HEBÛN/ERSÎN ÇAKSU / ANF/ŞEHBA
Artêşa tirk û çeteyê ci, 20ê Çileyî ra nata hêrişê Efrînî kenî û heta nika bi seyan sîvîlî qetil kerdî û hendêna zî birîndar kerdî. Vera hêriş û dagîrkerîya artêşa tirkî de xoverdayîşêko tarîxî ame nîşandayîş û xoverdayîş hîna zî dormeyê Efrînî de dewam keno.
Heto bîn ra merhaleyê dîyine yê kampanyaya ‘Wa seba Efrînî heme cinîyî biwerzî payan ser’ ame dayîş. Babete ser o Endamê Kongra Starî yê Kantonê Efrînî Wehîde Xelîle û Erîfe Bekîre qisey kerdî û qala kampanyaye kerdî.
Wehîde Xelîle va ‘hêrişê dewleta tirkî seba pêardişê xeyalê Osmanî yî’ û wina dewam kerde: “Ma vera nêyî de merhaleyê dîyine yê kampanyaya ‘Wa heme cinîyî seba Efrînî bierzî payan ser’ da destpêkerdiş. Ma do çarçewaya kampanyaye de xebatanê xo bidomnî. Ma do heta peynî xover bidî û çalakîyanê xo bidomnî. Heta nika dewletê ke bêveng mendî zî ortaxê nê sucî yî. Yê ke vanî qey cinîyê Efrînî do fek Efrînî ra veradî, cinîyanê kurdan nêşinasnenî. Ez veng dana herkesî ke biwerzî payan ser.”
Heta agêrayîşî vindetiş çin o
Erîfe Bekîre zî wina va: “Ma roja de hêrişê dewleta tirkî dest pêkerdî ra nata çalakîyanê xo domnenî. Ma heta nika qet teslîm nêbî. Ma mecbûr mendî ke koç bikerî. Dewleta tirkî bi zorî şarî keyeyanê înan ra vete. Ma tîya de zî xoverdayîşê xo domnenî. Heta agêrayîşî ma do nêvinderî. Dewleta tirk û Erdogan do seba ke kewto Efrînî poşman bibî.”