Endamê Heyetê Caardişî yê Tevgerê Komelê Demokratîkî Aldar Xelîlî derheqê averşîyayîşê sîyasî yê herême de qezaya Til Birakî de kombîyayîşê şarî viraşt. Serkêşê eşîran, temsîlkarê komelê sîvîlan û şarê qeza beşdarê kombîyayîşî bîyî. Kombîyayîş bi rêzgirewtişî dest pêkerd û Xelîlî ercnayîşê muhîmî kerdî.
Xelîlî dîyar kerd ke şerê 9 serran yê herême ver şarî zaf dejî dîyî û wina va: “Çi heyf ke şer hîna dewam keno. Şaranê Vakur û Rojhelatê Sûrîye bi têkoşînê xo herême terorî ra pak kerd. Herême de Îdareyo Xoser awan bi, cok ra vera herême de zaf tehdîdî estî. Ganî herkes bivîno ke ma nêwazenî parçeyêk erd zî Sûrîye ra biqerfîyo. Tam eksê ci de goreyê ma çareserî bi dîyalogî mumkin o. Eke rejîmê Sûrîye çareserîye biwazo, ma do dîyalogan aver bîşêrî. Ma heyetêk erşawit Şam, labelê rejîmê Sûrîye heta nika gamêka bîyaye nêeşta.”
Xelîlî va ‘badê ke DAÎŞ herême de ame qedênayene, Serekkomar Erdogan şarê Vakur û Rojhelatê Sûrîye tehdît keno’ û wina dewam kerd: “Erdogan zerre de problemanê girdan cuyeno û seba ke nê probleman ra bixelisîyo, wazena şer bido destpêkerdene. Hedefê ma o yo ke ma şarê xo şerî ra bipawî. Bi hetkarîya QSDyî, mabênê Amerîka û Tirkîya de mekanîzmaya ewleyîya sînorî ameye ronayene. QSD goreyê aye peymane hereket keno, labelê Erdogan tehdîdanê xo domneno û ecizîya xo ya peymane ano ziwan. Erdogan wazeno huzûrê herême xira bikero û herême de dagîrkerîya xo awan bikero.”
ANHA / QAMIŞLO