2 rojî verê teyarayê dewleta tirkî Şengal û Rojawan de xeylê cayê ke hêzê Rojawanî û kesê sîvîlî tede estbîy ser de bombe varnayî. Vera hêrişo ke bi têkilîya dewleta tirk, PDK û DAIŞî de ame viraştiş de reaksîyonî her ke şonî zêde benî. Endama Konseya Serekîya Pêroyî ya KCKyî Zilar Sterke derheqê hêrişanê dewleta tirkî de qisey kerde.
Sterke va ‘ganî dagîrkerîya tirkî ke dişmenîya kurdan ser ro ameya awankerdiş bêra muhakemekerdiş’ û wina va: “Herinda nêyî de estena gerîla yena munaqeşekerdiş û no xefletêk o. Bîyayîşê wayîrê statuyî yê kurdan, pawitişê qezencanê xo û hewldayîşê kurdan yê dagîrkerîye ra rizgarbîyayîşî hetê dewleta tirkî ra sey problem yeno dîyayîş. PDKyî hemkarîye ra vîyarnayo û êdî ortaxîya sucê AKPyî keno. Ganî lîderîya PDKyî na raştîye qebul bikera û goreyê ci pozîsyonê xo bibedilna.”
PDK hêrîşanê AKP meşrû kena
Sterke dewamê qiseykerdişê xo de dîyar kerde ke netîceyê hêrişê teyarayanê dewleta tirkî de pêşmergeyê ke Şengal de bica bîbîy zî hedef ameyî girewtiş û dewamê qiseyanê xo de wina va: “Hîna dewleta tirkî îzehet nêdaybî, PDK îzehet da û va ‘bi şaşî bîyo’ û no zî xefletêko gird o. PDK herinda ke hesabê ci biperso, hewl dano ke hêrişê AKPyî pak û meşrû bikero. No, pêşmergeyê ke şehîd kewtî rê heqaretêko gird o. Ganî hêzê bişeref yê pêşmerge nêyî qebul nêkerî.”
Dagîrkerîya Tirk
Sterke qiseykerdişê xo de hayr ante ser dagîrkerîya tirkî ser û wina va: “Dagîrkerîya tirkî ke bingeyê ci de nîjadperestî esta, xo ser dişmenîya kurdan de dana awankerdiş. Bewnênê, dagîrkerîya tirkî nê zimistanî heme cayanê Vakurê Kurdistanî de operasyonî viraştî. Amed, Dêrsim, Xerzan, Botan û Serhat de bêmabên hêriş kerd. Tayê cayan de erdê Rojawanî dagîr kerde. Reyna her roje Kantonê Efrînî bi topan bombe kena û Warê Pawitişê Medya û dewanê Başûrê Kurdistanî bi teyareyan bombe kena. Nê 3 rojanê peyênan de zî warê Amed, Besta û Kato de hem hewa ra hem zî bejayî ra bombe varnena. Nê operasyon û hêrişan de hêzê YPG-YPJ, YBŞ-YJŞ, HPG-YJA Starî ameyî hedefgirewtiş. Çimkî damaranê ma hemînan de gonîya kurdî esta.”
Reyna wedarnayî
Sterke qala aliqnîyayîşê beyraqa Herêma Kurdistanî zî sey taktîkî hesibna û wina va: “Fotografê ci daxî bi hawayo baş nêame dayîş. Çimê dewleta tirkî de kurdî nêşênî bibî wayîrê beyraqêk û tehamulê dewleta tirkî nêyî rê çin o. Xora demêko kilm ra dima wedarnayî. Wexto ke eynî beyraqe Kerkuk de ameye aliqnayîş, dewleta tirk talîmatê ‘aye beyraqe ewja ra bîyarê ware’ daye. Hetta Erdoganî vatbî ‘Kerkuk bajarê kurdan nîyo, bajarê tirkan o’. Cok ra PDK bi hawayo veng hewl dano ke çimê Erdogan û dewleta tirka ke derheqê kurd û kurdîtî de çîyêk qebul nêkena rê xo weş û şirîn keno.”
Ganî muhakeme bikî
Sterke bale ante xeta çapemenîya ke nizdîyê PDKyî ya ser û wina va: “Çapemenîya ke nizdîyê PDKyî ya, bi temamî babete bi hawayêko cîya gêna deste. Ganî kurdî nêyî rê dîkat bikerî. Eke orte de çîyo ke bêro muhakemekerdiş bibo, o zî sîyaseto hemkar yê PDKyî yo ke vera Têkoşînê Azadîya Kurdî de dano xebetnayîş o. Çîyê esasî yê ke ganî bêrê muhakemekerdiş, estena leşker û îstixbaratê dewleta tirkî ya Başûrê Kurdistanî de û hêrişê dewleta tirkî yî. Labelê PDK herinda ke dagîrkerîya dewleta tirkî ya Kurdistan de bîyaro rojeve, estena PKKyî ya Başûr de ano rojeve. Rêxistinêka sey PKKyî Kurdistan de nêmano, do kura de bimano? PKK sey rêxistinêka kurdan, kura de kurdî estî se, PKK ewja de yo û no zî heqê ci yo.”
Wa teber de nêvînî
Sterke peynîya qiseykerdişê xo de veng da Kurdistanijan û va, “Ganî şarê kurd heme cayo ke tede yî de, bivejyî raşteyan û vera nê hêrişanê topyekunan de hêrs û reaksîyonanê xo nîşan bidî.
ANF/BEHDÎNAN