Komîteya Bawerî û Şaran a KCKe semedê ke aşma Muharremî ke semedê ezaya Kerbelaye roje yeno girewtiş, peynî bî, babete sero îzehetekî weşînayo û îzehetê xo de wina vato: “Lazim o elewîyî semedê aştî û demokrasîye hîna vîşêr xo beşdarê têkoşînî bikerî. Xoverdayîşê Kerbelaye ke xalekî muhîm a kultirê xoverdayîşî yo, roja ma ya eyroyên de semedê heq, edalet, biratî, barkerdiş û aştîye hêz dano şaran.”
Ma ci silam kenî
KCKe verdewamîya îzehetê xo de ciresnayo ke pîvanê Ezaya Muharremî semedê erjê merdimayî muhîm o û wina domnayo: “Firazbîyîşê xoverdayîşê Kerbelaye vejyayîşê dijî qesr, sultan, mal, milk û zaliman o. Gird û dîrokîbîyîşê xoverdayîşê Kerbelaye, têgêrayîşê Îman Huseyîn ke vatênê: “Herinda cuyayîşekî bêrumetin û seserran, cuyayîşê bi rumet û rojeke başêr o” ra yeno. Hemverê nêyî êy ke cenazeyê şehîdan teşhîr kenî û cayê firaz xira kenî, barbar î û no şer û têkoşîn eyro bi heman awayî dom keno. Ma sifteyîn canên elewîye û her kesî semedê ke azadî sero sere wedarnayo bi hîs û fikrê Huseyînî, silam kenî.”
Yezid xetê zalim o
KCKe peynîya îzehetê xo de wina vato: “Hem Kurdistan, hem Tirkîya û hem zî Rojhilato Mîyanên de hedîseyê inasarên hîna zî qewimyenî ke çeteyê DAIŞe yê ke nesilê Yezîdî dişmentîya heme şaran kenî. Yezîd xetê zalim o û hetê ci de bawerî û îman çino. Ma sifteyîn veng danî şarê elewîyan û dima zî her kes wa rayê xo bidî HDPe û wa sindoqanê xo ra zî wayîr bivejyo.”
ANF/BEHDÎNAN
Verdewamê çinîkerdişî yo
Serekê Komeleya Pîr Sultan Abdalî ya Amedî Cafer Koluman dîyar kerd ke Dêrsimî de hêrişê dijî şehîdgehan verdewama polîtîkayê asîmîlasyon û çinîkerdişî yî û wina vat: “AKP heme kesê ke hemverê ci muxalefetî kena sey dişmenî vînena û wazena înan bipelçiqna. Dewleta ke hemverê ma rêz nîşan nêdana, kateyanê ma ra tersena û bi rayîrê merdan wazena mesaj bida ma. AKP kamîya îslamî semedê menfîetê xo xebetnena. Vana ez misilman a labelê camî, cemxane û şehîdgehan sero bombe varnena. Vanî Ellah û Ekber û sîvîlan qir kenî. Ma no misilmanî ya qey?
Hêriş dijî merdimatî yî
Pîrê Elewî Hîdayet Ulugerçek zî ciresna ke aşma Muharremî aşmekî firaz a û wina verdewam kerd: “Ma elewî na aşme de veradê rijnayîşê gonîye, ma kardî daxî nêxebetnenî. Labelê AKP îbadetxane û şehîdgehê ma sero bombe varnena û nêy hêrişî nêmerdimî yî. Mabenê Yezîd û îqtîdara eyroyên de ti cîyayî çino. Hemverê elewîyan îşkenceya tewr gird cemxane û parçekerdişê kateyê kesê ke qirkerdişê 1938’î de amey qetilkerdiş o. Ma do hemverê nêy hêrişan îbadetxaneyanê xo newe ra awan bikerî.”
DÎHA/AMED