Sîyasetmedar, parlamenter û temsîlkarê rêxistinanê sîvîlî ke Tirkîya de îmkanê sîyasetî nêvînenî, vera xo danî Ewropa. Labelê sîyasetmedarê ke şonî Ewropa, reyna zî hedefê Rêxistina Îstîxbaratî ya Mîllî ya Tirkî (MÎT) de yî. Tewr peynî paytextê Fransa Parîsî de 3 cinîyî bi nameyê Sakîne Cansize, Fîdan Dogane û Leyla Şaylemeze hedef ameybî girewtiş.
Her roje endamêkê MÎTî deşîfre beno û planê MÎTî yê derheqê sîyasetmedaranê kurdan de zî vejîyenî orte. Hedefê endamanê MÎTî de bitaybetî sîyasetmedarê kurd Remzî Kartal, Zubeyîr Aydar, Yuksel Koç û Sevahîr Bayindire estî. Babete ser o nê sîyasetmedaran qisey kerd.
Endamê KNKyî Zubeyîr Aydar: Seba ke dewleta tirk wazena kurdan çinî bikera, cok ra ma hedef gêna. Kurdistan de bajaran xira kenî û merdiman veşnenî. Na çarçewa de wazenî ma rê suîqast bikerî. Nê hêrişê suîqastî 2011 de dest pêkerdî. 2013 de ma bedelêko giran da û 3 embazê ma ameyî qetilkerdiş. Seba ke mabênê 2013 û 2015î de prosesê aştîye dest pêkerd, nê hêrişî vindetbîy, labelê proses dima ra xira bî, reyna planê înan vejîyayî raşte. Tayê endamê MÎTî ameyî tewqîfkerdiş. Ma tedbîranê xo gênî, labelê waştişê ma o yo ke ganî dewletê Ewropa nê têkilîyan bivejî raşte. Her çiqas ke Parîs de cînayetêk virazîya, reyna zî Fransa bêveng a. Eke Fransa bêveng nêbîyêne, ewro MÎT nêşînayêne wina çîyan bikerdêne. MÎT ewro sere de Almanya û zaf welatanê Ewropa sey merkez xebetneno. Reyna Hollanda, Belçîka, Fransa û Îskandînavya zî merkezê MÎTî yî. Nê planî konsolosxaneyan de yenî amadekerdiş. Talîmatê peyên Qesre ra yenî. Eşkenî ma hedef bigîrî, labelê nêşênî netîce bigîrî.
Hemserekê KCDK-E Yuksel Koç: Goreyê daneyê ke destê ma de yî, 2 lingê nê planan estî; nînan ra yewe ekîbêkê Tirkîya ra yeno erşawitiş, ya dîyine zî tirkê ke tîya de manenî ra ekîbêk ameyo amadekerdiş. Tewr peynî Mustafa Karataş Hamburg de ame tepiştiş û qeydê ci yê vengî de xeylê çîyî vejîyayî orte. Çend ekîbî estî û nînan Ewropa goreyê herêman parçe kerdî. Hedefê înan de ma sîyasetmedarî estî. Par malumatêk resa ma ke 3 ekîbê înfazî ameyî Almanya û nê ekîbî bin denetîmê Erdoganî de xebetîyenî. Nika dozê ke hetê welatanê Ewropa ra derheqê nê kesan de yenî akerdiş zî bi hawayo şexs abenî.
Hemserekê KONGRA-GELî Remzî Kartal: Planê hêrişî ke vera ma de amade benîy, parçeyêkê şerê Kurdistanî yî. Ma proseso ke winasî de yî ke Cizîr, Silopî, Şirnex û Sûr de qetlîyamî virazîyayî, vera gerîlayan de operasyonî virazîyenî, vera sîyasetmedar û partîyê sîyasîyan de zî hêrişî benî. Wazenî erjanê şarê ma orte ra wedarnî. Wexto ke ma pêroyîya konseptî ra ewnîyenî profîlê Erdoganî vejîyeno orte. Heta ewro xeylê planê înan vejîya orte. Bitaybetî Almanya xebetnenî; çimkî tîya de nufusê tirkan zêde yo. Nê planan cayanê sey Hollanda, Fransa, Belçîka û Swîsre û zaf cayê ke kurdî tede cuyenî de amade kenî. Nika Erdogan Ewropa de ‘merdimo ke nîno waştiş’ ameyo îlankerdiş. Labelê no qîm nêkeno. Ganî Dewletê Ewropa mudaxaleyê plananê MÎTî bikerî.”
Parlamentera Kehene ya BDPyî Sevahîr Bayindire: Seba ke Tirkîya de heqê sîyasetî nêdîya mi, ez ameya Ewropa. Tirkîya de wexto ke destpironêginayîya mi estbîye, ez raştê hêrişî ameya û hedef o bî ke Botan de komelî bêpawitiş veradî. Hesabperskerdişê ma tayînan eciz kerd û cok ra ez ameya hedefgirewtiş. Ewro planê ke yenî viraştiş dewamê ê hêrişan î. Çiqas hêriş kenî wa bikerî, ma do gêrayîşê xo yê heqîqetî bidomnî. No zîhnîyet do hesab bido. Ez veng dana huqûqnas, femînîst û pawitoxê heqê merdiman wa vera nê planan de hesas têbigêrî. Şerê Saraye şerê ma yo zî. Ma nê sîstemî ra nêtersenî.
ANF/BRUKSEL