Derheqê referandûmo ke 16ê Nîsane de amebî viraştiş de munaqeşeyî hîna dewam kenî. Bitaybetî sindoqê ke HDPyî ser de çinêbî, ê sindoqan de se ra 90 ya vejîya, reyna nizdîyê 2 mîlyon û nîme pusulayê bêmorî hetê YSKyî ra ameybî qebulkerdiş û sewbîna bi seyan hîle û kayî ameyî kerdiş. Babete ser o Parlamentera HDPyî ya Şirnexî Aycan Îrmeze qisey kerde.
Îrmeze va ‘herêmê ke tede xoverdayîşê xoserîye ameybî îlankerdiş de bi hawayo gird nê vejîya û no zî nîşan dano ke planê rijnayîşî yê dewlete têk şîyî’ û wina dewam kerde: “Vatişê ‘herême de reyê ma zêde bî’ çîyêko manîpulekerdişê raştîyan o. Çimkî Tayyîp Erdogan Kurdistan de vînî kerdo.”
Şarî cewabo lazim da
Îrmeze dewamê qiseykerdişê xo de va ‘her çiqas ke şert û mercê OHALî de referandûm ame viraştiş, reyna zî şarî cewabo lazim da AKPyî’ û wina qedênaye: Bi nê cewabî polîtîkayê AKPyî herême de têk şîyî. Erdoganî roja referandûmî vatbî ‘çim û goşê mi reyê ke do başûrrojhelat û rojhelatî ra bêrî de yî’. Bi no hawa waştbî ke seba ke ya bivejîyo, wa heme çî bêro kerdiş. Şarî tehdît kerdî û bi her hawayî zulm û teda şarî ser de kerdî. AKP bitaybetî Şirnex de propagandaya ‘eke şima reya ya nêdî, do keyeyê şima bêrî girewtiş’ kerdêne. Labelê şarî va ‘wa keyeyê to zî û karê to zî yê to bo, ti hêz nêşêno bivîyaro vernîya îradeya şarî. Xeyalê îqtîdarî veng vejîyayî. YSKyî xo dekerd herinda qanûnviraştişî û bi no hawa qerar da. Reyê nê kewtî mîyanê sindoqî la tira nêvejîyayî. Wa her kes bizano ke ma qerarê YSKyî nasnêkenî. ”
ŞÛJIN/ANQARA