Sûka Almanya Bremen de qetlîamê sivîl ke dewleta tirk bi çeteyan ra pîya dewanê Cerablûs de viraşt raştê nêrazîbîyenan amê. Kurdistanijê ke bi nûmayişekê hayr antî nê hewldayenanê leymin yê dewleta tirk ser bi slogan û mesajan nêrazîbîyanê xo damûsnay. Nûmayişa ke komanê çep yê Alman zî paşt day de temsîlkarê Federasyonê Êzidî qisey kerd û vist vîrî ke dewleta tirk ke çeteyan girotî xo het seba çinkerdişê serkewtişanê kurdan êriş kena. Hemserokê NAV-DEM yê Bremen Saît Bîlgînî zî qetlîamê ke Rojawa de bî protesto kerd û waşt ke dewleta tirk û çeteyê pîyakar ca de Rojawa terk bikero. Bîlgînî ard ziwan ke seba ke serkewştişê ke kurdan Rojawa de girotî dest vinî nêkerê ganî her roj meydanan de nûmayişanê demokratîk virazê.
Almanya paşt dana polîtîkayanê îşgal yê Tirkîye
Kurdistanijê ke sûka Almanya Aachen’de ciwîyenê zî jû şîyayiş û mitîngê protestoyî viraştî. Nûmayişkarê ke Alê YPG/YPG û posterê Ocalanî hewaday bi slogan ver Keyeyê Şarî ra heta Elisenbrunnen ray şî. Qiseyan de vajîya ke hedefê Tirkîye DAIŞ nê serkewtişê Şoreşê Rojawa yo. Parlementerê Meclîsê Federal yê partîya çep Dîe Lînke Andrej Hunko zî tewrê nûmayiş bi û rîwalê paştdayişê polîtîkayanê îşgal yê Tirkîye dewleta Almanya rê nêrazîbîyen damûsna. Hunko Almanya ra waşt ke nêbo pîyakarê qetilkerdişê sivîlan yê dewleta Tirkîye.
“Terorîst Erdogan”
Hambûrg de zî Kurdistanijî Hachmannplatz de are bî û qetlîamanê sivîl yê dewleta tirk protesto kerdî. Aktivîsta çepger Anja Flach ke nûmayiş de qisey kerd da zanayiş ke hedefê dewleta tirk de çeteyê DAIŞ nê Xorayverînê Demokratîk yê Rojawa estê. Flach vist vîrî ke Cerablus kêberê DAIŞ û çeteyanê bîn ke abîyeno Awrûpa yo û aşkere kerd ke no rewş seba welatanê Awrûpa zî talokeyekê gird o. Anja Flach veng da raya pêroyîn yê Awrûpa ke verra hewldayenê îşgal ke dûştê hiqûqîno de vinderê. Mitîngî de sloganê “Terorîst Erdogan” û “Bê Serok ciwîyayiş nêbeno” berz bî. Sûk de roja Dişembe ra tepya mavêna seatanê 12.00 û 18.00 de Jungfernstieg de nûmayişê xêmronayişî virazîyeno.
Oslo ra heta Rojawa hêrsê kurdan
Koln de zî nûmayişê protestoyî hetê Meclîsê Cenîyan yê Vîyan virazîya. Tîya de zî êriş û qetlîamê hikûmeta AKP yê Cerablûs protesto bî. Qiseyan de bêvengî û pîyakarîya dewletanê Awrûpa rê nêrazîbîyen damûsnîya. Nûmayiş de sloganê “Terorîs Tirkîye Rojawa ra def bi”, “Awrûpa fînanse kena, Tirkîye bombevornena” berz bî.
Paytexta Norveç Oslo de zî nûmayişê protestoyî ver Parlamentoyî de virazîya. Nûmayişo ke çar leteyanê Kurdistanî ra kurdî tewr bî de hikûmeta AKP aya bî. Qetlîamê dewleta tirk herzewbîn sûkanê Rojawa de zî raştê nêrazîbîyenan amey. Dirbêsiyê, Til Temir û Zirgan de bi hezaran kesê ke vejyay meydanan hewldayena îşgal û êrişê dûştê sivîlan protesto kerdî.
NAVENDÊ XEBERAN