Pîyê Mesut Yalavuzî ke qezaya Licê ya Amedî de hetê leşkeran ra bi datîzayê xo Osman Yalavuzî reyde ame kutiş û ê halê xo yê birîndar erşawîyayîş zîndan Halîl Yalavuzî wina va: “Leşkeran derba mergî daya laj û birazayê mi ro. Nika zî do înan mehkeme bikerî. Esil ez gerrekar a”
19ê hezîrane de leşkerê ke qezaya Licê ya Amedî de vejîyaybî operasyon, dewa Beşişte de Osman Yalavuz û Mesut Yalavuzî tepiştî û mîyanê hêgayî de daybî gêrayîş, dima ra îdîa kerdbîy ke Mesut destê înan ra remayo. Labelê rojêk dima ra Mesut Yalavuz bi hawayo giran birîndar erazî de amebî dîyayîş.
27ê hezîrane de zî leşkeran bi mehneya ‘îmzeya înan esta’ veng daybî înan. Her çiqas ke lokreyê Mesut Yalavuzî ameybî tirakerdiş û mîde û qesebaya ey zirar dîybî zî, tedawîya ci nîme de veradîya û her di datîzayî zî erşawîyayî zîndan. Pîyê Mesut Yalavuzî û datê Osman Yalavuzî Halîl Yalavuzî derheqê çîyê ke şahidîya înan kerdbî, qisey kerd.
Lajê mi rê îşkence kerdî
Yalavuzî va ‘roja hedîseyî de hîna tîje nêakewtbîye ez şîya ke bostanê xo awe bida, la mi dî ke leşkeran dormeyê bostanê mi girewto’ û wina dewam kerd: “Leşkeran veng da mi, ez şîya hetê înan. Mi ra vatî; ti kesî ra mevaje ma tîya de yî û şo keye, ma to tîya ra taqîp kenî. Ez zî agêraya keye, lajê mi Mesut keye de rakewte bî. Dima ra, lajê mi Mesut şî heywanan ver. Leşkeran yew bi yewe dewijan ard pêser û nasnameyanê înan kontrol kerd. Tam o wext ma eşnawit ke Osman mîyanê bexçeyî de birîndar o. Serê sibayî rew birîndar bîyo, la dima ra ambulanse ci berda nêweşxane. Wexto ke ez şîya hetê heywanan mi dî ke destê lajê mi kelepçekerde yî. Leşkeran lajê mi tehdît kerdêne, seba veşnayîşê wesayîtanê înan qebul bikero, îşkence bide kerdî.”
Bêgune tewqîf bîyî
Yalavuzî va ‘leşkeran heme ciwanan ra bi hawayo ke terorîst bo, ewnîyayêne’ û wina dewam kerd: “Bi hawayo hovane îşkence bi lajê mi kerdî. Xora dewijan ra zî bi ê çimî ewnîyayêne. Eke destê înan ra biameyêne, ma hemînan rê wina kerdênê. Hema tedawîya lajê mi dewam kerdêne, ci tewqîf kerdî. Bi hawayo bêgune lajê mi û birazayê mi birîndar kerdî û dima ra tewqîf kerdî. Çira dayî lajê mi ro? Polê birazayê mi Osmanî bi îşkence şikitî. Laj û birazayê mi her di zî raştê îşkenceyî ameyî. Çi sucê laj û birazayê mi estbî. Laj û birazayê mi tewqîf kerdî. Ez do senî na neheqî qebul bikera? Esil ez do derheqê înan de gerrekar biba.”
DÎHABER/AMED