Munafiqê girşî onca bervenê. Bi taybetiye Leyîr Evren dano xoro, seweta Esma berveno. Esma Misir de hetê eskerê Mirir ra amê qetil kerdene. Tabî mordem nî domonurê gune bibervo. Piyê xo kam beno bibo, sene fikir de beno bibo. Kistena domonu qetlîam o.

Ma Leyîr Evren naskeme, heştîrê ey rastken niyê. Propaganda keno. Raştiye de zerrê xo nêdezeno, zerya xo seweta domonu nêerzena. Heştîrê xo zur yê.
Verê mi de jû eskerakerdîsê komîsyonê domonu yê Komela Heqanê Mordemî yê Amed esto. Na belge emser asma hezîrane de amê eskerakerdene. Belge de nuşîno, ke demê serdest biyayena AKP, 2002 ra na het 171 domonî amê qetil kerdene. Nî domonî Misir de nê, Kurdistan û Tirkiye de amê kistene. Hetê polîs û eskeranê AKP ra amê kistene. Nî biyayîsan ra tepiya ma nêdî, ke serokwezîro tirk berveno.
Biyarîme xo vîrî! Ugur Kaymaz 13 serren bî. Hetê ppolîs û eskeranê Erdogan ra bi 12 gulleyan ame qetil kerden. Quwetanê dewleta Erdogan ebi Ugur ra piya, piyê ey zî qetil kerd. Na biyayîs de zî ma nêdî, ke serokwezîro tirk berveno.
Biyarîme xo vîrî! 2006 peye asma adare polîs û eskerê tirkî Amed de 13 însanî qetil kerdî. Nînan ra 7 teneyî domon bî. Enes Ata hona newe kewtî bî 7 serrî. Ma o waxt zî nêdî, ke serokwezîro tirk Recep Tayyîp Erdogan seweta domonu berveno. Leyîr Evren se vat o waxt: “domon, cenî, kam beno bibo, polîs û eskerê ma, çike lazim o, ey kenê.”  Nî domonî misirizî nêbî, kurdistanizî bî. Ma zoneme, ke Recep Tayyîp Erdogan her tim biyayîsan ra dime polîs û eskeranê xorê berxûdariye vano. Polîsê ke domonu kisenê, eskerê ke domonu kisenê.
Biyarîme xo vîrî! Ceylan Onkol 14 serren biye. Serre 2009. Çê xora vejiye tever, ebi rokete amê pirtley kerdene. Maya Ceylane tîkê lesa aye kerdî are, eştî pêstemala xo. Serokwezîrê tirkî Recep Tayyîp Erdogan nî resmî diyê herhal de. Ceyalana ma zî hetê eskeranê Erdogan ra amê qetil kerdene. Onca ma nêdî, ke Recep Tayyîp Erdogan seweta Ceylana ma berveno.
Onca biyarîme xo vîrî! 28ê asma gaxane yê serra 2011 eskeranê tirkî Roboskî de 34 domonê kurdî qetil kerdî. Çapemeniya tirk nêwast na xevere vilakero. Çike hukumatê Erdogan nêverdenê. Serokwezîro tirk seweta domonanê Roboskî zî nêberva. Hata ewro zî sermiyanenya xo qebul nêkerda.
De bê, heştîranê Recep Tayyîp Erdogan rê îman bike!
Mavênê Sîsî û Erdogan de hora jû ferq esto: Sîsî Misir de domono dano kistene, Erdogan zî Kurdistan de.