Bi krîzê ekonomî ra pîya Tirkîye de esnafî gonî kenê vinî û bêçare mendîye. Nê esnafan ra tayî zî yê Kapaliçarşiyê Stenbolî yê. Esnafê Kapaliçarşi yê Stenbolî day zonayen ke nika wextê tewr xirab ciwîyenê û aşkere kerdî ke karê înan se ra 80 bîyo kêm. Esnafan aşkere kerdî ke zerreyê rojî de hûmara muşterîyan 200 ra vistiya 20î.
Stenbol de yew cayo ke krîzê ekonomî tesîreke gird keno Kapaliçarşi yo. No cayo ke 4 hezar dikanî estê de esnafî rojanê zaf zehmet ra ravêrenê.
Esnafan ra Omer Yenîkoy aşkere keno ke rîwalê polîtîkayê şaş yê teber na serra peynî de dikanê înan giroteyê. Yenîkoy ano ziwan ke dikanê înan giroteyî bê rindêr o, nêbo zî pereyê kirê nêdanê, fatûre nînê. Omer Yenîkoy’î aşkere kerd ke kar se ra 80î bîyo tayî û va, ‘hûmara 200 kesê ke ver kêberê esnafî ra ravêrdî vistîya 20an. Esnaf Yenîkoy’î aşkere kerd ke eke wina dewam bikero do xêlê esnafî dikananê xo bigîrê.
‘Turîst çîno kar zî çîno’
Esnafê bi nameyê Zafer Koç ke dikanê ci yê kozmetîkî esto zî polîtîkayê şaş yê teberî zey sebebê krîzî damûsna. Koçî vist vîrî ke wexto ke ê ravêrdî naca dolar 2.80 bî, la nika 3.40 a. Koç aşkere kerd ke teqînayişa Sultanahmetî ra dima kar zî qerfnîya.
Ozan Ozmenî zî vist vîrî ke bi sebebo ke turîstî nîne no serrekê vêşêr o ke karê înan zî kêm bîyo û wina dewam kerd: “Ekonomîya sûkî bi turîst û dowîzan ra girêdayîya. Xêlê dikanî amey girotiş. No 20 serrîyo ke ez tîya de ya, mi çiyekê wina nêdî.
‘Demê tewr xirab’
Esnafan ra Aygul Kap zî da zonayen ke bi sebebo ke kar çîno ê serranê ravêrdî geyrenê. Kap’î vist vîrî ke bi seyan dikanî amey girotiş û ê zî xover danê.
Semî Yildizî zî krîzî ra gazincan kerd û vist vîrî ke berzbîyayişhe dowîzî tesîrê înan keno. Yildizî aşkere kerd ke wayîrê keyeyî hewl danê ke ser payan de vinderê û va, ‘beno ke ma zî bivilêşîye û şirê. Yildiz da zonayiş ke o 20 serrîyo esnaf o û 8 serrîyo zî Kapaliçarşi de yo û va zey esnafî ê ‘demê tewr xiravîn’ ciwîyenê.
STENBOL