ADNAN BÎLEN
MA / QERS
Bi nameyê Cahît Denîzî de keso ke 40 serrî yo ke Sînemaya Bajarê Qersî de makînîstîye keno, karê xo ra zaf hes keno. Denîz dîyar keno ke demê peyênan de qet eleqe sînema rê nêmendo û no het de rewşe qet baş nîya.
Denîzo 67 serrî va ‘makînîstîya sînema wextê xo de meslego tewr zehmetin bi’ û wina domna: “Labelê bi vejîyayîşê sînemaya dîjîtale ra dima no mesleg zî êdî ver bi qedîyayîşî de yo. Mi bi rotişê dendikan dest pêkerd û dima ra ez derbazê odaya sînema bîya. Mi bi makîneya komirine reyde dest pêkerd û ê makîneyî zaf problemin bî. Ganî merdim bi saetan serê ci de bimendêne. Ez zaf ê makîneyan musaybîya. Ge-ge problem vejîyayêne û merdiman salone de qîyamet wedarnayêne. Mi zaf reyan fîlm şaş pakerdêne û merdiman reaksîyon nîşan dayêne.”
Denîzî qiseykerdişê xo de qala eleqeyî kerd û wina va: “Verê cû bajar de 5 salonê sînema estbî û wextê fîlman de heme salonî pirr bîyênê. Çimkî şîyayîşê sînema kultur û eşqêk o. O wext herkes şîyêne sînema. Ewro nûfis 10 qatî zêde bîyo, labelê sînema rê eleqe nêmendo. Verê cû her bajar û qeza de salonî estbî, labelê seba ke eleqe kêmî bi, ameyî padayene. Nika bi hezaran merdiman qet salonê sînema nêdîyo. Ez wazena wa emrê mi tîya de biqedîyo. Wa ser mezelê mi de ‘Sînemakar Cahît’ bêro nuştene. Ez ge-ge hewnê xo de zî derheqê karê xo de çîyan vînena. Ez hende nê karî ra hes kena û ez senî fek tira verabida?”