Mehkemeya padîyayîşê televîzyonanê Med Nuçe TV û Newroz TVyî ame dîyayîş û her di televîzyonî zî mehkeme qezenc kerdî; Mehkemeya Bazirganîye ya Parîsî her di doze de zî Eutelsatî mehkum kerde. 14ê Teşrîna peyêne de ameyêne pawitiş ke mehkema qerarê xo bidero, la seba ke hakimî qerar îmze nêkerdbî, qerar tayê erey kewt. Mehkemeye qerarê domnayîşê weşanê Med Nuçe û Newroz TVyî girewt.
Qerar meşrû nîyo
Qeraro ke derheqê Med Nuçe TVyî de ameyo girewtiş de hakim Thîerry Hubert-Duponî wina vato: “Qerarê vindarnayîşî destê Eutelsatî de nîyo, sazî û dezgeyê ke Belçîka de yî, destê înan de yo. Îdîayê ke hetê RTUKî ra ameybî vatiş, hete Eutelsatî ra nêameyî îsbatkerdiş û Peymana Televîzyonê Teberê Sînorî yê Ewropa hetê Eutelsatî ra ameyo îxlalkerdiş.”
Seba her roje 10 hezar euro
Dewamê qerarî de ameyo vatiş ke ‘qerarê vindarnayîşê weşanê televîzyonan ke 3ê teşrîna verêne de ameybî girewtiş, wa bêro wedarnayîş û wa televîzyonî weşanê xo bidomnî’ û reyna mehkeme qerar de dîyar kerda ke wa heqê zirarê televîzyonan zî bêro dayîş. Heto bîn ra mehkeme şîrketê Eutelsatî mehkumê dayîşê 5 hezar euro tazmînatî kerdo û vato ke eke nê di televîzyonî dest pê weşanî nêkerî o wext şîrket do her roje 10 hezar euro tazmînat bidero.
Seba azadîya çapemenîye serkewtişêko gird o
Avûkatê Med Nuçe TVyî Jean Louîs Malterre derheqê qerarî de va ‘şîrketê Eutelsatî îtîraz bikero zî qerar nêbedilîyeno’ û qiseykerdişê xo wina domna: “Hetê azadîya çapemenîye de no serkewtişêko gird o. Eutelsatî ganî goreyê Tirkîya nê, goreyê qanûnanê welato ke girêdayeyê înan î, hereket bikerdêne. Eutelsatî goreyê konvansîyonê Ewropaye hereket nêkerd la nika ganî goreyê qerarê mehkeme hereket bikerî. Eutelsatî peymana mîyanneteweyî îxlal kerd.”
PARÎS