Hûmara sifteyîn ke bi dosyaya “Mekan” vejîya de xêlê nuşte, roportaj, meqale û şîîre dewlemend û rengînî ca gênê. Pinar Yildiz “Romanê Pîltane de Analîzê Mekanî” ser o nuşto. “Herakleîtos” de Mekanî, Şîîra M.Malmîsanij Ser o Tehlîlêko Metaforîk” hetê Ahmet Kirdar ameyo nuştayiş. “Şîîra Mehmet Said Aydinî de Kesayetîya Parbîyayî û Sînorê Ziwanê Trawma û Mekano Vîndîbîyaye” Abdullah Çelîkî giroto qelem. “Hîkayeya Çakêto Sipî de Tengkerdişê Mefhûmê Mekanî” hetê Weysel Hanyildiz û fotografê gureyê “QEDÎM”î hetê Firat Aygunî ameyo antiş.
Edebîyatî ra heta ziwanî
Zewbîn zî nuşteyê kultur û edebîyatî ser o zî Kovarî de ca girotî. “Şîîre, Nasname û “Etnîk”ê Malmîsanijî “ hetê Ronya Bewran, “Mekanê Azadîye û Telî: Huner û Tabû” hetê Ugur Sermîyanî amey hadrekerden. Mûrat Aygunî zî Denîz Gunduz reyde roportajeke viraşt. Gunduz bi nê vatenan edebîyat terîf keno: “Edebîyat de çîyo girîng o yo ke hetê peyme, teknîk, uslub, toşe û sewbîna çîyan ra ganî yew çîyo newe, ê verênan ser o bêro vêşî kerdene. Nêke babete, mekan, ca xoser girîng nîyo, çîyo girîng o yo ke ti nê çîyan senî newirnenî.”
Gureyê “Açarnayîş û Açarnayox” bi îmzeyê Newzat Valêrî, “Kitabê Sînemaya Bêvenge Ser o” bi îmzeyê Esat Şanli û gureyê “Wayîrîya Hembeşe (Shared Ownership) û Folklorê Kurdan” bi îmzeyê Michael L. Chyet, û gureyê “Ziwannasîye rê Destpêkêk” bi îmzeyê Ahmet Kirkanî Kovara “Ewro” de ca girotî.
NAVENDÊ XEBERAN