Vera xespbîyayîşê îradeya Kurdan de Ewropa de zî çalakîyê protestoyî bêmabên dewam kenî. Roja ke qayûmî tayîn bîyî ra nata xeylê welatanê Ewropa de Kurd û dostê Kurdan vejîyayî raşteyan û vera destsernayîşê şaredarîyan de reakîyon nîşan dayî.
Nê welatan ra Swîsre û Atîna de çalakîyî dewam kerdî. Bajarê Basel û Luzernî yê Swîsre de kurdistanijî û dostê Kurdan vejîyayî kuçeyan û xespkerdişê şaredarîyanê Amed, Wan û Mêrdînî û hêrişê vera Başûrê Kurdistanî de şermezar kerdî. Bajarê Luzernî de rayraşîyayîşêko merkezî ame viraştene. Seranserê Swîsre ra kurdistanijî tewrê çalakîye bîyî û hêrişê hukmatê AKPyî yê vera Kurdan şermezar kerdî.
Bajarê Baselî de zî rayberîya ciwanan de bi çalakîya bêîtaatîya sivîle hêrişê dewleta Tirkî yê vera Kurdan de ameyî şermezarkerdene. Çalakîya ke hetê Tevgerê Ciwananê Şorişgêran ra ameye organîzekerdene de derbeya qayûmî û hêrişê dagîrkerî yê vera Başûrê Kurdistanî ameyî şermezarkerdene. Ciwanan bi pankart û siloganan xespkerdişê şaredarîyan û operasyonê dagîrkerî yê vera Başûrî de şermezar kerd û waşt ke hêrişî bêrê vindarnayene.
Atîna de vera qeyûmî çalakîya nobete
Paytextê Yewnanîstanî Atîna de çalakîya nobete vizêr roja xo ya çarine de dewam kerde. Çalakîya ke hetê Platformê Yewîya Çalakîyan ê Vakurê Kurdistanî-Tirkîya ra ameye organîzekerdene û meydano namdar Syntagma de yena viraştene de derheqê qayûmî de xeylî vilawekî ameyî vilakerdene.