Welatanê Ewrupa de, qandê raydayinî, teniya 5 rojî mendî. Peyniya heftey de jî, kurdistanijan û çoşmeyê demokratîk ê Tirkiye ê Ewrupa de, qandê raydayin verê xo açarna konsolosxaneyan. Bi hezaran weçînayoxî şî konsolosxaneyan û rayê xo day HDP.
Komîsyonê Weçînayin ê HDP jî, bi otobus, mînîbus û wesaîtanê taybet, weçînayoxan kirêşenê cayanê raydayini. Ê cayan ra jew ca jî, Parîs o.
Parîs de hetanî vizêr şan, nezdiyê 32 hezar kesan rayê xo day. Goreyê vatena wezîfedaranê HDP, %60”ê weçînayoxan, rayê xo dayê HDP. Eynî wext de, roja yewşeme 2 veyv û zamay jî, bi çinayê xo ê veyvey şî sandiqan ser, rayê xo day HDP û dest bi weşîna newî kerd. Swîsre de jî, kurdistanij û çoşmeyê demokratîkî bi eleqeyê girda qandê HDP şinê sandiqan ser.
Komîsyonê HDP ê Swîsre qandê eleqeyê girdî kêfweşînê xo ard ziwan û vat: “Lazimo eno eleqe heveyna vêşîbo û gerek hetanî 31”ê gulan, qe jew kurd û demokratê ray nêdaya memano.”
Danîmarka de jî, kurd û çoşmanê demokratîk ê Tirkiye miyan de coş û heyecanê weçînayinî estbi. Komîsyonê HDP, 3 sûkanê ciya ra 3 otobus û 20 wesaîtana welatijî kirîştî cayê raydayini. Kişta bîn ra Kongreyê Cematê Demokratîk ê kurdanê Ewrupa KCD-E jî, qandê weçînayinî fina bîn veng da kurdistanij û çoşmanê demokratîk ê Tirkiye. KCD-E vist vîrî ki, qandê raydayin teniya 5 rojî mendê û heme kurdistnajin û demokratanê Tirkiye ra wast ki, qandê serkewtinê HDP heme quwetê xo seferber bikirê.
NAVENDA XEBERAN