OZGUR PAKSOY/MA/AMED
Dewa Oleka Corî ya Bedlîsî de Goristanê Garzanî de 267 cenazeyî bê xebera merdimanê înan ameybî vetene û erşawîyaybî Dezgehê Tibê Edlî yê Stenbolî (ATK). Vetişê cenazeyan ser ro 10 aşmî derbaz bîyî, labelê bêxera 2 cenazeyan, cenazeyî nêdîyayî keyeyanê înan.
Herçiqas ke cenazeyî bi mehneya ‘testê DNA’ ameyî vetene, heta nika tena cenazeyê Dîlan Bîngole û Celal Ovmene dîyayî keyeyanê înan. Heta nika keyeyan ra nimuneya DNA zî nêameyo girewtene. Nê keyeyan ra yew zî keyeyê Dagî yo. Gerîla Îsmaîl Dag (Cemşîd) 2003 de herêma Garzanî de şehîd bibi û 2014 de Goristanê Garzanî de amebi defin kerdene.
Dayîka Dagî Kudret Dage qisey kerde û nêdîyayîşê cenaze ser o reaksîyon nîşan daye. Dage va ‘mi reyêk daxî rîyê lajê xo nêdî’ û wina domnaye: “Bi vetişê cenazeyan yewna rey ê dejî bi ma dayî cuyayene. Ma muracatê ATKyê Stenbolî kerd, labelê heta nika nimuneya DNA ma ra nêgirîyaye. Ma 10 aşmî yo ke paweyê girewtişê cenaze yî. Este zî nêmendo. Ê wazenî se bikerî. Ez esteyanê lajê xo wazena. Ez veng dana heme partîyanê sîyasî û dezgehê komelî yê sivîlî ke wa no het de hesas hereket bikerî.”