Seba ke maîlê Wezîrê Enerjîyî Berat Albayrakî ke hetê Redhackî ra ameybî deşîfrekerdiş, kerdbî xebere rojnameger Omer Çelîk, Tunca Ogreten û Mahîr Kanaat ameybî tewqîfkerdiş. Rojnamegerî tewqîfbîyayîşî ra 10 aşmî dima vejîyayî mehkeme û Omer Çelîk tehlîye bî.
Rojnameger Omer Çelîkî derheqê çîyê ke cuyabî û zext û tedayê ke rojnamegeran ser de benî de qisey kerd. Çelîkî va ‘konjokturo ke kewtişê zîndanî ra ver estbî heta nika nêbedilîyayo, hetta hîna xirab bîyo’ û wina dewam kerd: “Salona ke ma tede ameyî mehkemekerdiş de xeylê polîs û cendirmeyî estbî û no fotografê Tirkîya bî. Ma rojnamegerîye ver ameyî mehkemekerdiş. Dozger û hakimî zî zanayênê. Tirkîya de çapemenîye êdî bi qelemşoran yena caardene. Yê ke wina kenî zî bin nameyê rojnamegerîye de kenî. Na rewşe maîlan de zî dîyar bîye û seba ke raştîyî vejîyayî, hende eciz bîyî.”
Mehkeme raştîyan ra tersaye
Çelîkî dîyar kerd ke wexto ke o qala îşkenceyo ke wextê tepişîyayîşî de bide bîyo kerdêne, heyetê mehkeme eciz bî û wina va: “Seke Tirkîya de çîyêko winasî çinêbo, hereket kerdî. Cok ra vatî ‘nê çîyê muhîm nîyî, ma derbazê çîyanê esasîyan bibî’. Avûkatê Wezîr Berat Albayrako ke bi hawayo mexdur daxilê doze bî, mehkeme de va ‘ziwanê dayîke yê Komara Tirkîya tirkî yo, kurdî ziwanêko etnîk o. Cok ra ez wazena wa bêro perskerdiş, Çelîk tirkî zano an nê?’. No vatiş daxî nîşan dano ke tehamulê kurdî û pawitişî nêkenî. Waştî çîyê ke derheqê Sûr û Cizîrî de ameyî cuyayîş, biniminî. Mehkeme raştîyan ra tersaye.”
Hûmara ma kêmî ya, la tesîrê ma zêde yo
Çelîkî dewamê qiseykerdişê xo de wina va: “Ma heme zanî ke medyaya muxalîfe rê çi ame kerdiş. Hûmara ma kêmî ya, labelê tesîrê ma zêde yo. Ma zere de piştîdayîşyewbînano ke amebî kerdiş, hîs kerd. Xora o piştîdayîşyewbînan ma zîndan ra vete û do ameyoxe de embazanê ma zî bivejo. Zext û tedayî 12ê êlule ra derbaz kerdî. Hîna hîrê hewte verê cinî û mêrdeyê 70 serreyî ameyî tewqîfkerdiş. No daxî halê Tirkîya nîşan dano. Ewro zext û tedayî zaf zêde bîyî. Ez do nika ra pey hîna zaf ser zext û tedayê ke zîndanan de benî ser o hesas biba. Seba ke Tunca û Mahîr ewja de mendî, ez kêfweş nêbîya. Eke huqûq bibîyêne, na doze nêbîyêne. Ganî ma vengê îtîrazî berz bikerî.”
MA/STENBOL