LEZGÎN AKDENÎZ / MA /AMED
Rayberê Şarê Kurdî Abdullah Ocalan 8 serran ra dima 2ê Gulane de 2 avûkatan reyde pêvînayîş viraşt. 6ê Gulane de ame vatene ke Ocalan avûkatanê xo reyde pêvînayîşt viraşto. Avûkat Newroz Ûysala ke pêvînayîş de ca girewt, qala pêvînayîşî kerde.
Ûysale daye zanayene ke Birêz Ocalan hetê fîzîkî de baş asayêne û wina dewam kerde: “Ma weşîya ci pers kerd, labelê Birêz Ocalanî sey hertimî na reye zî waşt ke wa weşîya ci plano dîyin de bimano. Pêvînayîşanê her wextî ra cîyayêr, no pêvînayîş de camo ke mabênê ma û Birêz Ocalanî de estbi, amebi wedarnayene. Labelê cîhazê qeydkerdişê vengan reyna masa ser o bi.”
Ûysale qala vatişê Ocalanî kerde û ê vatişan wina rêz kerd: “Ez komplo ra dima 20 serrî yo ke giravêk de mîyanê çar dêsan de yena tepiştene. Şexsê mi de şarêk yeno tecrîdkerdene. Ez 20 serrî yo ke vindetişê xo ra tavîz nêdana. Heta ez roje bi roje hîna bihêz bîya. Ez êdî hîna baş fikirîyena.”
Zafê mektûban nêdîyayo ci
Ûysalî va ‘ma xora binizamî kitab, kovare û rojnameyanê rojaneyan şawenê’ û wina dewam kerde: “La wextê pêvînayîşî de ma eşnawit ke rojnameyê Yenî Yaşamî nêdîyeno ci. Tayî rojnameyî diyenê ci la binîzamî yan zî bênîzamî yo ma nêzanî. Xeylî mektûbanê ma ra tena 2-3 mektûbî girewtbî, mektubê ey zî nêresayî ma. Hewt-heşt kanalê televîzyonî eşkeno temaşe bikero. Ocalanî nimuneyek da û va ‘ez nika mîranê Cizîrî wanena, mesela Mem û Zîn a ke sey hîkayeya eşqî yena zanayene, esasê xo de tîra demokratîkbîyayîşî ana ziwan’. Ocalan dîyar kerd ke o şêno muwekkîlanê bînan bivîno.”
Ez kerdoxo polîtîk a û tîya de ya
Ûysale arde ziwan seba ke prosesêko newe çin o, qala çîyêko newe kerdiş zor o. Ûysale dîyar kerde ke Ocalanî bi hawayo net wina vato: “Ez prosesanê 2013-2015 û 2010-2011î ra hîna bi hawayo kûr fikirîyena û fam kena. Çîyê ke sereyê mi de yî zelal î. Ez goreyê pozîsyonê xo muxatab a, kerdoxo polîtîk a. Ez mabênkar nîya û ez tîya de ya. Bi serran o ke no wina yo.”