Dayîke Hesîna Gulera ke mêrde û lajê aye zîndan de yî û lajê aye grevê vêşanîye de yo, Parka Koşuyolu de xover dana. Dayîke Gulere va ‘dewleta tirkî mijûl kena û gaman nêerzena’ û wina domnaye: “Tena yew pêvînayîş reyde tecrîd nêwedarîyeno. Heta ke tecrîd wedarîyeno ma do xover bidî.”
RÛKEN DEMÎR / MA / AMED
Vera tecrîdê serê Rayberê Şarê Kurdî Abdullah Ocalanî de çalakîyê grevê vêşanîye dewam kenî. Çalakîya Hemsereka KCD û Parlamentera HDPyî Leyla Guvene roja 194. de dewam kena.
Heto bîn de çalakîya Nasir Yagizî roja 181. de, ya hepsîyanê zîndanan roja 156, ya Îmam Şîş û 14 çalakwananê Strasbourgî roja 155, ya Yûsûf Îbayî 129, ya Fadîle Toke zî roja 121. de ya. 30 hepsîyanê ke çalakîya xo açarnabî rojeyê mergî, grûba yewine 20 rojî xo pey de verda.
Reyna çalakîya parlamenteranê HDPyî Tayyîp Temel, Murat Sarisaç û Dersim Dage zî dewam kena. Habîb Gulero ke Zîndanê Kandira de maneno, 1ê Adare ra nata grev de yo. Pîyê ci Siddik Gulero 79 serrî zî Zîndanê Hatayî de maneno. Her dîyan zî cezaya muebbetî girewta.
Ez hîs kena ke lajê mi çi hal de yo
Dayîke Hesîna Gulere zî seba ke destek bido hepsîyan Parka Koşuyolu de çalakîye de ya. Gulere dîyar kena ke ganî demêko raver tecrîd wedarîyo. Gulere va ‘wexto ke lajê mi dest bi grevê vêşanîye kerd, mi ey dî’ û wina domnaye: “Ez extîyar a û hertim nêşêna şêra pêvînayîşê lajê xo. Labelê ez hîs kena ke lajê mi çi hal de yo. Zerrîya mi seba lajê mi veşena. Lajê mi telefon de hêzêko winasî dano mi ke, ez zaf kêfweş bena. Ez bi hêzo ke danê mi, têkoşîn dana.”
Ma zaf zehmetîyî dîyî
Gulere daye zaneyene ke aye wexto ke mêrdeyê aye zîndan de yo ra nata zaf zehmetîyî dîyî û wina va: “Mêrdeyê mi zîndan de bi. Domanê mi şenik bî. Ma zaf zehmetîyî antî. Ma ameyî Amed, labelê ti kesî ban nêdayêne ma. Ma zaf dejî antî. Ez serê sibayan nêşêna keye de nan biwera û yena parke. Lajê mi her roje seba têkoşînê xo ver bi mergî şono. Îradeya ci zaf pîl a û ez ey reyde îftîxar kena. Dewleta tirkî gaman nêerzena û hertim mijûl kena. Tena yew reye pêvînayîş bî, labelê tecrîd nêqedîyayo. Heta ke tecrîd wedarîyeno, ma do xover bidî. Dayîkî her roje rasteyan de yî. Çira, çimkî zerrîya înan veşena. Ma dayîk î, çira hende hêrişê ma kenî?”
Êdî bes o, gaman bierzê
Gulere peynîya qiseykerdişê xo de va ‘lajê mi zaf zeyîf bîyo’ û qala dîyalogê xo yê telefonî kerd: “Mi ey ra va ‘ti çira kewtî grevê vêşanîye’ lajê mi va ‘Dayê ma hende çinêbîyayîş dî û zehmetîyî antî, ez nêkewa têkoşînî mîyan wa kam bikewo?’. Mi zî tira va ‘lajê mi ti heqdar î. Ez zî vana ‘Ma hende zulm û zehmetîyî dîyî. Pîyê to zîndan de yo, ti grev de yî. Êdî bes o; ez nêşêra çalakîyan wa kam şêro?’ Wa selahîyetdarî vengê dayîkan biheşnî û gaman bierzî.”