16ê nîsane de Tirkîye û vakurê welatê ma de referandûm esto. Nê referandûmî de hîrê meylî estê. Weçînitoxî do virnayîşê qanûnê bingeyî rê, ya vajê ”e”, ya ”nê”, ya zî ”boykot” bikerê. Boykot zî yeno manaya ”e”. ”E”, yeno manaya qanûnîkerdişê dîktatoreya rejîmê Tirkîya û Erdoganî. ”Nê” yeno manaya ”ma zilmê dewlete û rejîmdê dîktatoreya Erdoganî nêwazenê.” Boykot zî yeno manaya ”kam se keno wa bikero, kam zilm keno wa bikero, kam kurdan înkar keno wa bikero ma rê lazim niyo!”
No referandûm de, kiştê de MHP, AKP, dewlete û Erdoganî ya estê û îmkananê dewlete pêrine bi kar anê û propagandayê ”E” kenê. Kişta bîne de, bi argumananê zaf cîyayan a û bi îmkanandê zaf werdîyan a xeylê partî, sendîkayî, komelî û roşnvîrî estê û vanê ”nê”. Cepheyê boykotî de zî tayn kurdê ke diha vêşî hewayê xo Başûr ra gînê û çend grûbê çepî yê tirkan estê. Baş o, ganî kes se kero?
Kurdê ke wazenê ”boykot” bikerê, bi zanayîş yan zî nêzanayîş a, bi awayêdo şermok a, hetkareya rejîmê Tirkîye kenê. Kiştê ra vanê ”seba ke na dewlete kurdan qebûl nêkena, ma meşrû nêvînenê.” Kişta bîne ra bac danê na dewlete, eskereya ci kenê, passaport, nasname, peranê ci bi kar anê û pa ciwênê. Co ra tawrê înan bê hetkareya AKP û Erdoganî çî na niyo.
Nê ”boykotçî”yan ra tayn zî vanê ”ma senî CHPya kemalîst û yê bînan a yew cephe de ca gênê. Qiseyênda kurdan esta. Vanê ”wexto kes şino şîn, her kes merdandê xo rê bermeno.” Na mesela zî wina ya. Referandûmî de ”Nê”vatişê ma û ê bînan zey pê nîyo. Helbet ê bînan ra tayn seba demokrasî vanê ”nê”, labelê zafêrê înan seba dewamkerdişê rejîmê kemalîstî vanê ”nê”. Heta ke qanûnê bingehîn de estbîyayîşê kurdan û heqê înan garantî nêbo, ma kurdan rê esas de ferqê yew rejîmê tirkan zî çinyo. Cora sedemo ke ma na polîtîka aktîf protesto bikerê, ganî ma vajê ”nê”. ”Boykot”, yeno manaya ke ”ez meselada zilmo ke dewletê kena bêteref a.” Ma dinya de welatparêzeyênda winasîne esta?
Kes çi rê vajo nê?
Semedê ke kes vajo nê zafî yê. Ez do înan ra çend heban tîya de binusa. Bi nê virnayîşê qanûndê bingeyinî ya înkarkerdişê kurdan dewam keno. Dîktatorê do qederê welatî û şarî ser o qerar bido û cuya demokratîk seba heme şaran bena xeyal. Qedexeyo ke ziwandê ma û perwerdeyê bi ziwanê ma ser o esto, do dewam bikero. Qetlîamî û talanê sey Sûr, Cizîr, Şirnex, Gever û cayanê bînan do hîra bê û dewam bikerê. Kar ra eştiş û sirgûneya karmendanê kurd û demokratan do dewam bikero. Eştişê kurdan zîndanî do hewna vêşî bo. Yanê kesê ke vajê ”ma mixalîf ê, do rîyê rihatî nêvînê. Dişmeneya Rojava û Başûrî do hewna hera û xorî bo.
Semedo ke, kes vernî nê çîyan ra bigîro ke raya demokrasî û azadî abo, ganî ma vajê ”nê”. ”Nê”, bi kilmeyî yeno manaya ‘zilmê dewlete û AKPî rê’ ”nê”! ”E” yeno manaya zilmê dewletê û AKPî rê ”e”. Boykot zî yeno manadê ”na dewlete û partîyê ci se kenê wa bikerê, ma rê lazim nîyo!”
Ê ke zilmê na dewlete ver vijênê referandûm de vanê ”nê”. Ez zî yew înan ra ya û vana ”NÊ”.