Yewîya Wendekaranê Azadan ser nameyê rojnamegere Denîz Firate de musabaqeyêk organîze kerde. Musabaqeyê Şîîr û Hîkayeyan yê Denîz Firate ke emser reya 4. ame organîze kerdene de xelatî dîyayî. Kesê ke musabaqe ra xelatî girewtî ra yewe zî şaîre û rojnamegere Roza Metîna ya.
Babete ser o Metînaye va ‘her donem vera nasname, îrade û bedenê cinîyan de hêrişî benî’ û wina domnaye: “Labelê reyna zî cinîyî sere nêronenî. Cok ra ez hîkayeya cinîyan nusena.”
Metînaye dewamê qiseykerdişê xo de wina va: “Mi musabaqeyêko bîn de hîkayeya Dayîka Taybete nuştbî. Reyna Musabaqeyê Hîkayeyan yê Kilmî yê Rojawawanî de zî mi Cemîle Çagirga ser o nuştbî. Emser zî mi Sultan Irmaka ke cêrzemînanê Cizîrî de ameybî qetil kerdene ser o nuşt. Ez cinîyanê qehremanan ser o nusena. Cinîyê qehremanî hêzê xo cinîyê qehremanî yê tarîxî yê sey Leyla Qasime, Besê, Gulnaze, Gurbetellî Ersoze, Mîna Qazî û Zarîfeyan ra gênî.”
Cinîyê kurdî wayîrê tarîxê xo vejîyayî
Metînaye peynîya qiseykerdişê xo de qala xoverdayîşê cinîyanê kurdan kerde û wina qedênaye: “Cinîyê kurdî hertim mîyanê komelî de rolê rayberî girewtî ser milê xo. Cinîyê kurdî hertim wayîrê tarîxê xo vejîyayî. Sey Denîz Firate. Denîz Firate zî hêzê xo tarîxê xo ra girewte û heta peynî têkoşîn daye. Seba resnayîşê heqîqete xover daye. Ma rayîrê Denîz Firate û embazanê aye de şonî û ma do wayîrê mîrasê înan bivejyî. Kesê sey Denîz Firate, Nujîyan Erhane, Şîlan Arase, Rohat Aktaş, Rizgar Adanmiş hişê komelî de cayêko gird girewtî. Ê nameyê xo bi herfanê altûnênan derbazê tarîxî kerdî.”
JINNEWS / AMED