Mayanê Plaza de Mayo ra Nora Morales Cortînasa ke verê cû Leyla Guvene zîyaret kerdbî, va ‘ez têkoşînê Leyla ra zaf tesîr bîya’ û wina dewam kerde: “Ez bawer kena ke kurdî do têkoşînê xo bidomnî û beyraqa xoverdayîşî qet xo dest ra nêronî. ”
LUCRECÎA FERNANDEZ / LEANDRO ALBANÎ / ANF
Sey Mayanê Şemeyî yê Stenbolî Mayê Plaza de Mayo her hewte Meydanê Mayo de yenê tehet û semedê vindîbîyayê domananê xo û vîndîbîyayê 30 hezar kesan edalet wazenê. Çalakîya mayanê arjantînijan 42 serrî xo ya dima verdayî. Nê meydanî de azadîya Ocalanî zî yena waştene û mesajê paştdayîşê Kurdan yenê dayene.
Mayanê Plaza de Mayo ra Nora Morales Cortînase ya ke menga Adere de gama ke Leyla Guvene grevê vêşanîye de bî a zîyaret kerde, çalakîya Plaza de Mayo de derheqê xoverdayîşê şarê Kurdî de qisey kerd.
Cortînase va ‘seke yeno zanayene Ocalan 20 serrî yo Îmrali de yo û Leyla Guvene 6 mengî cuwa ver semedê wedartişê tecrîdê serê Ocalanî dest bi girevê vêşanîye kerd’ û wina domnaye: “Çalakîya ke bi hezaran tepişteyê sîyasîyî tewrê ci bîyî bi vatişê Leyla yê ‘Semedê merdişî nê bi waştişê cuyêka bianore’ ameye viraştene. Dimayê çalakîya 200 rojan vernîya dîyayîşê Ocalanî abi û na dewa heme dinya de ameye vînayene. No semed ra Erdogan mecbûr mend ke qedîyayîşê tecrîdî bidê eşnawitene.”
Kurdî do beyraqa xoverdayîşî nêronî
Cortînase da zanayene ke ganî ma bawerîya xo bipawî û wina dewam kerde: “Ez bawer kena ke kurdî do têkoşînê xo bidomnî û beyraqa xoverdayîşî qet xo dest ra nêronî. Goreyê mi no çîyêko zaf muhîm o û îspatê xoverdayîşê tarîxî yo. No nîno aye mana ke hukmat kurdan mîyanê huzur û rehetî de biverdo, labelê kurdî no het de averşîyayîşê xo domnenî.”
Mi heskerdişê nê merdiman teqdîr kerd
Cortînase dimayê çalakîye qisey kerde û wina va: “Roja verêne senî ke mi Leyla Guvene zîyaret kerde, xoverdayîşê aye mi ser o zaf tesîr kerd. Reyna hurmet û heskerdişê vera Raybero sîyasî Abdullah Ocalanî zî da mi hîskerdene ke no xoverdayîşêko raşt ê yew şarî yo. Mi heskerdişê nê merdiman teqdîr kerd. Xoverdayîş ser kewt la hêrişê Erdoganî nêqedîyayî. Ez Leyla rê heskerdişê xo şawena. Senî ke bi xoverdayîşê xo semedê şarê xo ser kewte, nika zî wa semedê weşîya xo wina xover bido. Ez Leyla û heme xoverdayoxan rê serkewtiş û cuyêka bianore wazena.”