Temsîlkarê hometa êzidî û elewî zî xo seba NÊ kenê hadre. Parlamenterê elewî yê HDP Alîcan Onlu û parlamenterê êzidî Alî Atalan aşkere kerdî ke dê hometa êzidî û elewî zî referandûma qanûno bingeyî de dûştê polîtîkayanê qirkerdişî vajê ‘Nê’.
KCD, HDK, HDP, DBP û TJA qerar day ke referandûmî de vûrnayişê qanûno bingeyî rê vajê ‘Nê’. No qerar roja verî bi deklerasyonekê wertex Amed de ame aşkere kerdiş. Parlamenterê HDP Alîcan Onlu û Alî Atalan derheqê qerarê partîya xo û referandûmî de qisey kerdî.
Parlementer Onlu vist vîrî ke seba vûrnayişanê qanûno bingeyî AKP bi MHP û Ergenekonîyan ra bî yew û şer (lej) day destpa kerdiş, mordeman qetil kerdî û sûkan rijnay. Onlu dîyar kerd ke qeyûmî tayînê şaredarîyan kerdî, parlamenterê ke şarî weçînay amey girotiş û vist vîrî ke AKP no 15 serrîyo eynî polîtîkayan ramena.
Pêrokîn dişmenê kurdan are benê
Alîcan Onlu da zonayen ke AKP-Qesr wazenê bi vûrnayişê qanûno bingeyî qetlîam û sûcê ke kerdî binimnê û wina dewam kerd: “Pêrokîn dişmenê kurdan dê are bibê û referandûmî de vajê ‘E’. Ser dişmenîya kurdan yewîyekê ronîyena. Referandûmî de kurdî zî dê hemverê zilma ke amê kerdiş rê vajê ‘Nê’. Ma qanûno bingeyî ke her kes û pêrokîn bawerî xo mîyan de vînenê wazenê.”
Onlu vist vîrî ke referandum seba pêrokîn şaran muhîm o û hayr ant weçîntoxanê elewîyan ser: “Seba elewîyan maneyê referandûmî cîya yo. Herkes zano ke zihnîyetê AKP-Qesrî yê Mûavîye Yezîd o. Ganî elewî zihnîyeto ke îtiqatê înan red keno û hêrişê navendê îtiqatê înan keno rê vajê ’NÊ’.”
Ganî êzidî polîtîkayanê qirkerdişî rê vajê ‘Nê’
Parlamenterê HDP Alî Atalanî zî hayr ant operasyonanê binçim girewtişan ser û vist vîrî ke enê hêrişî seba vernîgirewtişê xebatanê HDP yê referandûmî virazîyenê. Atalanî aşkere kerd ke wazenê vernîya kampanyaya ‘Nê’ bigîrê û zerreyê weçîntoxan de ters ronê.
Atalanî aşkere kerd ke bi vûrnayişê qanûno bingeyî wazenê şarê kurd û şaranê bîn çînî bikerê û qiseyanê xo bi nê vatenan qedêna: “Nayî ra ganî her kes tewrê kampanyaya ‘Nê’ bibo û dûştê rejîma faşîst û dîktator vindero. Hometa êzidî hetê hikûmet û Wezareta Karê Dîyanetî nînê qebûlkerdiş. Ewro Tirkîye de kamî, bîyayiş û civaka êzidî nîna qebûlkerdiş. Eke referandûmî de ‘E’ bivejyo û AKP qezenc bikero do ferman û qirkerdişê ser civaka êzidî dewam bikerê. Hikûmeta AKP dûştê şar, îtiqat û hetanê bîn polîtîkayanê dişmenî ravêr bena. Nayî ra sîstemo ke bi referandûmî ra bîro, do bi xo ra felaket bîyaro. Ez veng dana êzidîyanê zerre û teberê welatî ke tewrê kampanyaya ‘Nê’ bibê’.
AMED