Êzidîyê ke hêrişê çeteyanê DAIŞî yê 3ê Tebaxa 2014î ra remaybî û ameybî Tirkîya, hetê Şaredarîya Bajarê Girdî ya Amedî ya DBPyî ra Kampa Fîdanlikî de ameybî bicakerdiş. Dima ra îlanbîyayîşê OHALî ra pey qayûm tayînê şaredarîyanê DBPyî bîbî û êzidîyî na kampe ra erşawîyaybî Kampa AFADî ya Midyadî.
Kampa AFADî ke 12 hezar kesî tede manenî de ereb û êzidîyî estî. Kampe de seba ereban perwerdeyê erebî yeno dayîş, labelê seba êzidîyan perwerdeyê kurdî çin o. Domananê êzidîyan ser de asîmîlasyon yeno meşnayîş. Babete ser o cinîyê êzidîyî qisey kerdî û reaksîyon nawitî.
Ma wazenî tîya ra bivejyî
Cinîyêka êzidî va ‘tîya de ma şert û mercê seyyewbînan de nêcuyenî’ û wina domnaye: “Ma wazenî na kampe ra bivejyî. Mudurê kampe ma ra va ‘ganî şima çapemenîye rê qisey nêkerî’ û qedexe kerd. Ma tim raştê vatişanê nefretî yenî û nêverdanî ke ma îbadetê xo bikerî.”
Cinîyêka bîne ke nêwaşte nameyê xo bido, wina va: “Ma dermanan ra bigîre heta lazimîyanê xo yê bînan bi xo danî. Her çiqas ke hewte de 3-4 rey heqê ma esto ma bivejyî teber, reyna zî destûr nêdîyeno ke ma bivejyî teber.”
Ma rê heme çî bipere yo
Cinîya bi nameyê Xece Hece zî va ‘domanê nêşênî kampe ra bivejyî û tayê boya xo bidî’ û wina dewam kerde: “Cayê kampe de darêk daxî çin a. Ma nêşênî teber de îbadetê xo bikerî. Sifteyîn ma ra vatêne şeytan. Çîyêk reyde eleqeder nêbenî.”
Cinîyêka bîne zî bale ante cayê kaykerdişê domanan ser û wina va: “Badê ke kayê domananê ereban qedîyenî, dima ra dora kaykerdişî yena domananê ma. Mekteb de seba domananê ma perwerde nîno dayîş, ma ser de tirkî yeno ferzkerdiş. Domanê ma perwerdeyê tirkî ra çîyêk fam nêkenî. Senî ke perwedeyê erebî dîyeno, ganî yê kurdî zî bêro dayîş.”
ŞÛJIN/MÊRDÎN