Qezaya Midyadî ya Mêrdînî de êzidîyê ke kampa AFADî de yî, yenî cezakerdiş. Hukmatê AKPyî ke heta nika bi hezaran bextwaştoxanê sunîyan miqate kerd, vera kurdan de da xebetnayîş, bextwaştoxanê êzidîyan rê cuyêka yesîrî dano cuyayîş. Qirkerdişî ra dima nufûsê êzidîyê ke ameyî Tirkîya nizdîyê 33 hezar bîy. Êzidîyê ke ameyî Tirkîya Êlih, Sêrt, Amed, Riha, Midyat û Nisêbîn de ameybî bicakerdiş. Êzidîyê ke kampa AFADî ya Midyadî de yê bi probleman ra rî bi rî yê.
Seba muslumanan bêpere ya
Babete ser o êzidîyan ra N.A wina va: “Ma kampe de muameleyê bextwaştoxîya sinifa 2. vînenî. Problemê ma yê weşîye zaf î. Domanê şenik û tim nêweş kewenî. Pakî çin a û werd zî zaf xirab o. Ma nêşênî derdê xo doktorî ra vajî. Wextê girewtişê darûyan de muslumanî pere nêdanî, labelê ma ra se ra 20 reçete yeno girewtiş. Ma ser de zext û tedayî zêde yî.”
Ş.Xidiro 56 serreyî zî va ‘kesê ke nêweşxane û kampe de yî, herinda ke hetkarîye bidî, zext û teda înan ser de kenî’ û wina va: “Problemo tewr gird domanê şenikî. Wazenî şarê ma biqedênî.”
ANF/MÊRDÎN