Hêzê dewlete êzidîyê ke Amed û Nisêbînî de bîy, bi zorî berdbî kampê AFADî ke Qezaya Mîdyadî ya Mêrdînî de ya û nika pêro pîya 12 hezar bextwaştoxî kamp de manenî. Êzidîyî kamp de erebê ke Sûrîye ra ameyî reyde, manenî.
Êzidîyî dîyar kenî ke kamp de raştê cîyayî û heqaretî yenî.Babete ser o cinîyê êzidî qisey kerdî.Cinîya bi nameyê Zere Haci Xelefe ya şengalije va ‘ma wazenî kamp de bi hawayo seyyewbînan rêze bivînî’ û qiseykerdişê xo wina domnaye: “Dewlete ma bi zorî kampê Nisêbînî ra vete û ard kampê AFADî de bica kerde. Mîyanê kampî de muameleyo ke vera ma de virazîyeno û vera yê bînan de virazîyeno, sey yewbînan nîyo. Tena waştişêk mi esto, o zî agêrayîşê welatê xo yo. Ma ganî rîyê xo bidî tîje û dua bikerî, la ma nêeşkenî bikerî. Ma tersenî ke îbadetê xo bikerî. Ewja de seba ma cayê îtîkatî çin o. Ma heme çîyanê xo mîyanê çadirî de kenî.”
Doktor ma rê bipere yo
Cinîyan ra Şeme Hiço Şahape zî wina va: “Ma sey êzidîyê bînî yê ke kamp de yî, raştê heqaretî yenî. Seba ma kamp de doktor û darûyî daxî bipere yî, la eynî çî seba sûrîyeyijan bêpere yo. Melayo ke mîyanê camîyê kampî de waez dano, ma sey hedef nîşan dano. Ma nêyî ra tersenî.”
Xeylê problemî estî
Xeylê êzidîyê ke kamp de manenî, qiseykerdişî ra tersenî. Bitaybetî cinîyê êzidî vanî ‘ma xeylê probleman cuyenî labelê vatişê ci ra daxî tersenî. Seba ke ma tersenî, nêeşkenî teber ra yewî sey mîsafîr bîyarî mîyanê kampî.
ŞÛJIN / MÊRDÎN