Naye ra avê faşîstan zimelî kerdenê derg, ebi polîsan û eskeran ra pîya însanî kistenê. Kam ke nijadperest û panturkîst nêbî, hetê nî zimel dergan ra amenê kistenê. Dem vêrd ra faşîstê zimel dergî bî kemî. 2002 de Tirkîya de faşîstê lewê hîtî royayî bî jede.
Nî hem kisenê hem kî bi hezaran erzenê hepis. Hama hama sîyasetvanê kurdan tever ra nêverdê, her roz bi desan kurdan cenê zerre.
Çi hêf ke nî faşîsê lewê hîtî honde rew nêameyî naskerdene.
Gam bi game, giran giran pêro maqamê Tirkîya guretî xo dest.
Solganê xo nî bî: Alevî estê, heqê xo çînê, kurdî estê heqê xo çînê, her kes esto, hama heq û huquqê xo çîno, kes wayîrê tewayî nîyo, ma lewê hîtan ra qederî.
Ge ‘çaliştayê’ alevîyan virast, ge kurdan de ameyî têhet qeseykerd. Dima alevîyan ra vat ‘heqa sima esta ke Alî ra hasbikerê, la sima kî mislimanê ma yê.’ Kurdan ra vat ‘sima bêrê teslîm bê, ma sima ef keme. Hukumatê ma sima de qesey nêkerdo, dewlete sima de qesey kerdo.’
Dewlete sene cî ya, hukumat sene cî yo, na kî keşî marê araze nêkerde.
Tabî no taktîkê kistene û taslîm guretenê yê faşîstanê lewê hîtan o. Qesey kenê, hama sermîyanenî xo ser nêcenê, çike raştîye de nêwazenê meselan halbikerê. Armancê xo xapiten a.
Nî faşîstanê lewê hîtan Uğur Kaymaz ebi qersunan vît ro, zerre û zerya xo nêvêsê. Nî faşîstan Ceylan Önkol ebi rakete kiste, zerre û zerya xo nêvêsê. Nî lewê hîtan Enes Ata kist, zerre û zerya xo nêvêsê. Çike nî domonî kurdî yê.
Xanim û xatunê nî faşîstanê lewê hîtan domonanê Fîlîstîn rê heştîran kenê war, bi heqe, hama Uğur, Ceylan û Enes bîrûbazarê nînan de nîyê. Zalimanê mêrdanê xora nêvat, ‘lawo heq adirê sima wedaro, sima nî domanan ça danê kistene!’
Çike nî domonî kuirdî yê.
Pede pede paçkerdox û haskerdoxê nî faşîstanê lewê hîtan mavênê ‘demokratan’ de kî bî jede.
Rojnama Taraf ra Ahmet Altan, Emre Uslu û Yasemin Çongar lewê nî faşîstanê lewê hîtan paçkerdî. Endî gîlêja xo kewte têwerte.
Rojnama ‘Hürriyet’ ke waxtêde seweta hukumatê Tansu xanime çi bîye, Rojnama Taraf kî seweta hukumatê faşîstanê lewê hîtan aw a.
Kam beno bibo, kamo ke vano ‘PKK teyna adir bibirno, dewlete dewlet a, adir nêbirnena’ o kî endî lewanê nî faşîstanê lewê hîtan paçkeno.
Kamo ke nêvano ‘na dewleta ma tarîxê xo de bi mîlyonan kurdî kiştî, gune kurdan ra leborîna biwazo’ o kî endî nî faşîstanê lewê hîtan de bîyo bira.
Kam beno bıbo, kurd ya kî tirk, kamo ke vano ‘na hukumatî jû televîzîyon do kurdan, kurdî endî çi wazenê’ o kî endî bîyo faşîsto lewe hît.
Kamo ke jê dewleta xo qewxa xelesa kurdan ra vano ‘teror’ o kî endî bîyo faşîsto lewe hît.
Kemal Kılıçdaroğlu’yo ke vano ‘tezkere bîyarê meclîse ma poştî dame sima’ ey kî nî faşîstê lewê hîtî paçkerdê û endî kewto tonê înan, bîyo faşîsto lewe hît.