Bi serran o zîndanê Kurdistan û Tirkîya de zext û îşkenceyî nêqedîyenî û bitaybetî zî 15ê Temmuze teşebusê derbe ra dima nê zext û îşkenceyî resayî dûştêko tewr berz. Nê demanê peyênan de ser hepsîyan de cilê tek tîpî yenî ferzkerdiş û hepsîyî zî vera nê zext, îşkence û bitaybetî cilê tek tîpî de bi her hawayî xover danî. Nika tayê zîndanan de hepsîyî bi desan rojan o ke grevê vêşanî de yî. Babete ser o Endamê Komîteya Perwerdeyî ya PKKyî Nurettîn Demîrtaşî qisey kerd û vînayîşê xo ard ziwan.
Endamê Komîteya Perwerdeyî ya PKKyî Demîrtaşî dîyar kerd ke ancax merdim piştîya xo bido tarîxê xoverdayîşî yê Tevgerê Azadîya Kurdî, merdim eşkeno vera hêriş û tedayanê faşîzmê AKP û MHPyî de xover bido û wina da zanayîş ke hêrişê faşîzmê AKP û MHPyî yê zîndanan de netîce nêgêno. Demîrtaşî ard ziwan ke ganî zîndanan de tarzê Ocalanî û ruhê 14ê Temmuze û Halît Oralî bêro esas girewtiş û wina va: “Xoverdayîş ewro bi hawayo grevê vêşanî domîyeno û no zî tarzêko munasîb nîyo.”
Faşîzm nêşeno netîce bigîro
Demîrtaşî dewamê qiseykerdişê xo de va ‘wextê 12ê Êlule cuntaya faşîste ya leşkerî de hêrişê zaf girdî bîyênê’ û wina domna: “O wext seba ke vera nê hêrişan de xoverdayîş ameyêne kerdiş, faşîzm têk şî. Cok ra hêrişê faşîzmê AKP û MHPyî yeno manaya newe ra ganîkerdişê faşîzmê 12ê Êlule û senî ke o wext faşîzmê 12ê Êlule têk şî, do faşîzmê AKP û MHPyî zî têk şêro. Çimkî îradeyê zîndanan bi tecrubeyê serran bîyo sey pola û hêrişê faşîzmî vera na îradeya pola de nêşeno netîce bigîro.”
Ganî tarzê Ocalanî esas bêro girewtiş
Demîrtaşî qala xoverdayîşê Rayberê Şarê Kurdî Abdullah Ocalanî yê Girawa Îmrali de zî kerd û wina va: “Rayberîye zîndanan de kulturêko newe awan kerd û xoverdayîşê Mazlum û Kemalan bi formêko newe kirişt roja ma ya ewroyî. Rayberîye bi pêroyî de bi xoverdayîşê 18 serran û bitaybetî zî vera tecrîdo girankerde yê 2 serranê peyênan de lazim o merdim senî xover bido û hereket bikero, nîşanê herkesî da. Cok ra merdim şêno na çarçewa de xoverdayîşê xo aver bîşêro. Ganî ma hem zîndan de û hem zî teberê zîndanan de na xete esas bigîrî.”
Ruhê 14ê Temmuze nêbedilîya
Demîrtaşî qiseykerdişê xo de qala tecrubeyanê xoverdayîşê zîndanî kerd û qiseykerdişê xo wina domna: “Zîndan de qasê xo tecrubeyî estî û ganî merdim nê tecrubeyan esas bigîro û nê tecrubeyan ra feyde bivîno. Vera şert û mercê 12ê Êlule de bi ruhê xoverdayîşê 14ê Temmuze ame vindetiş. Merdim eşkeno ewro zî eynî hawa ê ruhî temsîl bikero û ganî temsîl bikero zî. Eke ruhêko qet nêbedilîyeno bibo, o zî ruhê 14ê Temmuze yo. Labelê beno ke şekil û tarzê ci bibedilyî.
Tavîzo ke bêro dayîş çin o
Demîrtaşî reyna qala xoverdayîşê Halît Oralî ke vera 9ê Teşrîna verêne ya roja destpêkerdişê Komploya Mîyanneteweyî de çalakîyêk viraştbî, kerd û wina va: “Senî ke embaz Halît Oralî Zîndanê Gurgumî de vera 9ê Teşrîna verêne ya Destpêka Komploya Mîyanneteweyî de çalakîye viraşt û helqaya sifteyîne ya çalakîya ‘Şima Nêşenî Roja Ma Tarî Bikerî’da destpêkerdiş, ewro zî merdim eşkeno nê ruhî temsîl bikero. Beno ke tarzê ci eynî nêbo. Çimkî eke tarzê ci eynî bibo, o wext yeno manaya taklîdî û netîce zî nêgêno. Hetta fek netîcegirewtişî ra verade, tarzêko ke ameyo mehkûmkerdiş. Ganî merdim bi ruhê Rayberîye û Halît Oralî xover bido. Heme zîndanî ê ruhî ra nasîbê xo girewtî û ewro kulturêko ke qet têk nêşono awan bîyo. No semed ra embaz û roşnvîrê ke zîndan de yî gere vera faşîzmê AKP û MHPyî de misqalêkî tavîz nêdî.”
Ti kes xo tepîya nêanceno
Endamê Komîteya Perwerdeyî ya PKKyî Demîrtaşî peynîya qiseykerdişê xo de wina va: “Ma kulturêko ke vano ‘Ox xoverdayîş çi weş o’ ra yenî; cok ra ti kes vera hêrişan de xo tepîya nêdano. Ma proseso ke vera faşîzmî de bi hawayo topyekun xover bidî de yî. Labelê ganî ma raybazanê çalakîye rê dîqet bikerî û ganî ma raybazan hîna dewlemend bikerî. Lazim o ma herinda grevê vêşanî de bi hawayo birêxistine, biîrade û bizanayîş hereket bikero. Ancax merdim wina bikero, eşkeno netîceyêko bimana bigîro. Hetta merdim eşkeno vajo xoverdayîşê ke bi çalakîyê komelî reyde bibî yewe, eşkenî faşîzmî têk bîşêro.”
Grevê vêşanî munasîb nîyo
Demîrtaşî da zanayîş ke şert û mercê ewroyî de xoverdayîş bi hawayo grevê vêşanî yeno nîşandayîş û no zî tarzêko munasîb nîyo û wina dewam kerd: “Hepsî hem bi bedenê xo yo rut xover dano û hem zî wexto ke îcab keno bedenê xo feda keno û bi grevê vêşanî zî nê vindetişê xo domneno. Herçiqas ke ge-gane ma nê tarzî xebetnenî, reyna zî ganî şert û mercê ewroyî de bi hawayo zanaye, birêxistine û biîrade xover bido, hîna bimana yo.”
Demîrtaşî veng da keyeyanê hepsîyan û wina va: “Xoverdayîşî tena bi zîndanan sînordar nîyî. Îradeya ke zîndanan de vejîyena, ganî biresa komelî zî. Çimkî hêrişê ke zîndanan de benî, parçeyê qirkerdişo ke komelî ser de yeno meşnayîş o. Rejîmê qirkerdişî wazeno hêrişê ke ser komelî de keno, bikirêşo zîndanan û temam bikero. Cok ra ganî xoverdayîş zî tena zîndanan de nêmano û ganî her di xoverdayîşî bibî yewe. Eke wina bibo, o wext merdim eşkeno netîce bigîro.”