Lej o ke hetê yewîye nimite hemverê jew artêşî de yeno dayen ra vajîyeno lejê (şerê) gerîla. Kesê ke nê yewîyeyan de ca gênê zî zey gerîla yenê binamekerden. Verên taktîkê nê lejî îspanyolijan hemverê artêşa Fransa Napolyon Bonapart de şixulnay. Zey "Lejê qijkek" yeno hesibnayîş. Lejê xoverdayîşî ke quwetê zeîf hemverê hêzdaran danê yo.
Bi sebebo ke Kurdan rê xeynê polîtîkayanê asîmîlasyon, red, înkar, îmha û qirkerdişî tercîhêko bîn veranêdîya, Kurdan zî seba ke bîyayîşê xo bipawê, qerarê xoverdayîşî da. Kişta felsefîk û îdeolojîk de hewcedarîye xoverdayîşê bi çekî zî girewtî. Eksê nêyî de tehluke estbi ke têkoşîn aqibetê serewedartîşanê verênan bicuwîyo. Têkoşîn hemverê artêşê diyîn yê gird ê NATO, bi taktîkê gerîlatî destpa kerd û 33 serrî yo bê mavên rameno.
Ko û gerîla Kurdistan de ruh, mezg û zerrîya Kurdan de neqiş bî. Seba Kurdan û şarê ke pîya ciwîyenê rê şîyayîşê gerîla cîyabîyayîş û ferqekê yo. Domanê ke Kurdistan de seba zewicîyayene û qezenckerdenê pereyê nanî rew bî pîl, endî seba ke şirê gerîla kewtî telaşê pîlbîyayîşî. Gerîla endî bi terzê ciwîyayîşî; ver bi tilsim, bawerî, çare, kamî, kesayetî, utopya û serbestî raygirewtiş bi. Bi vatişê Kurdan, gerîla endî jew efsane bi. Û no efsane; xeyal û sanik ra vêşêr, raştî û heqîqet bi xo yo.
Raywanîya heqîqetî
Şîyenê koyî, koyî de mendiş û ciwîyayîş, her tim zey "kovî" (yabanî) bîyayîş, weşîya "modern" ra dûrbîyayîş ame hesibnayen. No vatişêko serdest û fermî yo. Eke ciwîyayîşo "modern" no bo; yê ke tewrê gerîla benê, nay zey erdemêk û krîterê însanbîyayîşî hesibnenê. Koyan şenik (werdî) vînitiş û ciwîyayîşo ke sûkan zey "modern" hesibneno, kanser, nêweşîya psîkolojîk û fizîkî, cîyabîyayîş û xîntbîyayîş o. Yanî ciwîyayîşêkê pûçbîyayîşî yo. No jew bi qerarê emelê ciwîyayîşî û raywanîya heqîqetî reyde eleqedar o. Tam zî tîya de ferqê gerîla û ciwîyayîşê koyan vejîyeno werte.
Gerîla hemverê înkar, îmha û qirkerdişî tenya quwetekê lejî nêbi. Lejekê bi no rengî raşt nêvîna û lejekê nîya nêda ramiten. Gerîlatî cengawerîye weşîya azad û têduşt o. Koyî zî mekanê nê lejî yê. Ronayîşê ciwîyayîşê têduşt û serbest koyî de mumkin bi. O wext ma êşkenê koyî, zey bingeyê civakbîyayîşî û weşîya serbest bihesibnê. Gerîla tenhayîya koyan de, deşt û tîtikanê koyan de seba ronayîşê na ciwîyayîşî bi nameyê no şerî.
'Ciwîyayîşê serbest mimkûn o'
Gerîla, wexto ke paştê xo da koyî, wexto ke vejîya tîtikan, wexto ke bi çimanê helî ewnayîşêk eşt deştan; koyî açarna bingeyê pîyaciwîyayîşê pêrokîn ganîyan. Gerîla, senî ke koyî de ser erjanê hurmet û bawerî ciwîyayîşê serbest rona, vatişê 'ciwîyayîşê serbest mumkin o' açarnîya jew heqîqetî. Bado ke ganîyê ke xoza de, koyî de ciwîyenê bawer bikerê, endî kêberê pîyaciwîyayîşî abeno. Mirîçik yena nano ke destê şima de yo gêna û bi azade perrena û şona. Luya ke zey tersonek û qurnaz yena şinasnayîş, bi dostanîya ma ra bawer kena, yena û werdişê ke ma ci rê ternenê gêna û şona. Xezal heskerdişî çimanê gerîla de vînena, bê ke biterso û bikewo telaşî, bê ke keratan ra xo bierzo, rayîra xo ra dewam kena. Endî koyan de ciwîyayîş ser dostanî de ronîyeno û yeno ciwîyayen. Dostîye û embazîye zî ser bawerî ronîyena.
Kurdî: Şarê koyî
Deşt û sûk seba Kurdan (zey sanika Enkîdû) zey pîyakarî, îxanet û xerîb bîyayîşî, zey ke cayo ke ci ra dûrvistişî yenê qebûlkerdiş. No raştîyo ke vîrî de ca bîyo, seba Kurdan halê xoverdayîşî yo. Koyî, bi hezaran serran o seba kurdan bîyê cayê tîvarî, seveknayenî û weşîyê. Bî stargehê serbestîye. Çiwext ke Kurdî ver bi taloke û qirkerdişî ra rî bi rî mendî, verê xo day hetê koyan. Nayî ra Kurdî zey şarê koyî yenê silasnayîş. Dostîye kurdan yê bi koyan de şîyayîşeke winayî esta. Dê ameyoxê xo zî ser bawerîya koyî ronê. Ciwîyayîşo ke gerîla ser dostîye û bawerî rona de civakbîyayîşêko newe ronîyeno. No ciwîyayîş endî ser dew, deşt û sûkan de tesîrêko raşteraşt keno. Koyî, endî ver bi ronayîşê civakêko azad ray gênê.
Gerîla, koyanê Kurdistan de civakbîyayîşî roneno; seba estbîyayîşê kultur, kamî û ziwanê dayîke têkoşîn dano. Bê ke ziwanê dayîke xo vîr ra bikero, bê ke bikewo bêrêçî, zanayîşêko biunîversal ra eleqe ronayîşî de yo. Gerîla ciwîyayîşê serbest û têduşt yewbîyayîşê azad yê tîkel û unîversal de vîneno. Gerîla hendo ke ronayîşê ciwîyayîşê azad de rol kaykeno, temînatê seveknayîşê cîyo zî. Têkoşînê gerîla ke zey lejêko şenik yeno hesibnayen, bi nameyê weşîya azad xoverdayîşêko gird o.