SAFÎYE ALAGAŞ / ŞÛJIN / AMED
Fatma Ateşe qedexeyê tebervejîyayîşê qezaya Sûrî ya Amedî de keyeyê xo nêteriknaye. Wextê qedexeyan de guleyêkê topî gina keyeyê Ateşe ro û netîce de Ateşe birîndar bîybî. Ateş û 5 kesî 81 rojan ra dima taxe ra ameybî tehlîyekerdiş. 19ê sibata 2016î de ame vatiş ke ‘ma bi hawayo merde aye teslîm girewtî’ û cenazeya Ateşe pêşîya battanîyayêk.
Babete ser o vîdeoya kamêra ya newe vejîyaye raşte û çîyê ke vîdeo de yenê dîyayîş û îfadeyê xebatkaranê weşîye yewbînan nêtepişenî. Mehkema û raporê xebatkarê weşîye yê nêweşxaneyî de yeno vatiş ke wexto ke leşkeran Ateşe teslîm girewtî nabzê aye nêeştêne.
Wezîfedarê ambulanse Ugur O, wezîfedara weşîye ya ambulanse Elîf B û Dîlek Aye raporê teslîmgirewtişî yê emnîyetî de yewbînan ra cîya qisey kerdî û îfadeyê înan yewbînan nêtepişeno. Ugur O îfadeyê xo de vano; wexto ke ma Ateşe girewt merdbî. Dîlek û Elîfe zî eksê Ugur Oyî de îfade dayî; wexto ke ma Ateşe teslîm girewt, cuyayêne labelê ambulanse de hişê aye padaye bî.
Ateşe ganî bîye
Vîdeoyanê neweyan de yeno dîyayîş ke wexto ke Ateşe dekenî ambulanse, hişê aye akerde yo û leşkerî qîrenê 5 kesê ke Ateşe wedarnenî ser de û vanê ‘biverdê wa bimiro.’ 20 metre nizdîyê ambulanse ra yeno dîyayîş ke Ateşe battanîye mîyan de xo nalena. Nê vîdeoyan ra yeno famkerdiş ke Ateşe ganî bîya û dima ra merda. Mergê Ateşe ra dima persê ‘gelo Ateşe senî merd?’ yeno vîrê merdimî.