Seba ke Sîstemê Federalîya Demokratîke ya Vakurê Sûrîye bikewo dewre, şarê Rojawanê Kurdistanî do 22ê êlule de şêro sindoqan ser. Babete ser o Hemsereka Koordînasyonê Komîserîya Berze ya Xoser ya Weçînayîşê Herêma Cizîrî Ruken Mele Îbrahîme qisey kerde û derheqê sîstemo federal yê Vakurê Sûrîye de malumat daye.
Ruken Mele Îbrahîme dîyar kerde ke no sîstem do yewîya şaran aver bîşêro û wina dewam kerde: “Nizdîyê serrêk o ke no sîstem ameyo awankerdiş. No sîstem seba ke heme netewî cayê xo tede bigîrî û heqê xo qezenç bikerî, yeno waştiş. Çimkî sîstemê federalî vera sîstemê îqtîdar û koletî de yo û hedefê ci yo sifteyîn şar xo bi xo îdareyê xo bikero yo.”
Kombîyayîşê 3. de ame girewtiş
Rukene dewamê qiseykerdişê xo de va ‘rejîm bitaybetî vera nê sîstemî de yo’ û wina domnaye: “Çimkî no sîstem çareserîya krîzê Sûrîye yo. Goreyê qanûnê nê sîstemî herêma Cizîrî kantonanê Hesekê û Qamişlo, herêma Firatî kantonanê Kobanê û Girê Sipî, herêma Efrînî zî kantonê Efrîn û Şehba ra pê yeno. Her kanton de bajar, mintiqa û katon do bibîy. Nê parçebîyayîşî seba ke şarê ma bi hawayo asan karê xo bikero û problemanê xo çareser bikero ameyî kerdiş.”
Rukene derheqê weçînayîşî de zî wina va: “Ma sey Koordînasyono Berz seba weçînayîşan amadekarîya xo kerd. Seba namzedîya komunan 16ê tebaxe ra nata muracatî yenî kerdiş. Kesê ke wazenî bêrî weçînayîş, muracatê ma kenî. Ma do komunan ra dest pê bikerî. Çimkî her komun bingeyê komelî yo.”
ŞÛJIN/HESEKÊ