30ê Hezîrane roja çalakîya fedayî ya şorişgera cinîye ya meletîyij Zeynep Kinaci (Zîlane) ya. Na roje her serr hetê Tevgerê Azadî ra sey ‘Roja Fedayîtî’ yena şinasekerdiş û pîrozkerdiş. 

6ê Gulana 1996î de vera Rayberê Şarê Kurdî Abdullah Ocalanî de bi mînîbusêka bombebarkerde hêriş virazîyabî, dima ra cinîya gerîla ya bi nameyê Zîlane Dêrsim de vera yewîyêka leşkerî de çalakîyêka fedayî viraştbîye û yewîye heme tasfîye kerdbîye. Ewro serrgêra 21. ya Roja Fedayîtî yena cuyayîş. 21 serrî ser çalakîya fedayî ya Zîlane ra derbaz bîyî. Labelê vîrardişê ci ewro bi hawayo ganî cuyeno. Ewro nameyê Zîlane û Zeynepe bi hezaran cinîyanê kêna û cinîyanê kurdan de cuyeno. Şîîre û deyîrê tewr weşî bi ser nameyê Zîlane de ameyî nuştiş û wendiş. Ciwanê ke seba azadî dest bi têkoşînî kenî, ser nameyê Zîlane de sond wanenê. 


Her ca de terorêko faşîst esto

Îdareyê Tayyîp Erdoganî zî sey îdareyo faşîst û qirker yê 21 serrî verê ra cîyayêr nîyo. Her ca de terorêko faşîst û qirkerdiş esto. Kurdî her ca de yenî gulevarankerdiş û erzîyenî zîndanan. Ciwan û cinîyanê kurdan rê heqaret yeno kerdiş. Sey veşnayîşê dewan yê demanê verênan, ewro zî taxî yenî veşnayîş û xirakerdiş, bi hezaran merdimî ca û warê xo ra yenî koçkerdiş. Yanî hetê qirkerdiş û zulmî de ti cîyayî çin o. Labelê şaro ke vera faşîzmî de xoverdayîşî musayo esto. Çalakîya fedayî ya Zeynep Kinaci, çalakîya fedayî ya yewine ya Kurdistanî ya. Neke temamê têkoşînê azadî bi ruhê fedayî yeno meşnayîş. 


Her hetî de serkewte ya

Ewro zulm û qetlîyamo ke hetê faşîzmê AKP û MHPyî ra Kurdistan de yeno meşnayîş, ma ra vindetişêko sey Zîlane wazeno. Çimkî xeta Zîlane bena xeta serkewtişî. Çalakîya ke 30ê Hezîrane de ameye viraştiş, hetê leşkerî de serkewta, hetê sîyasî hêzêko gird dayo Tevgerê Azadîya Kurdistanî û hetê psîkolojî de moralêko gird dayo tevgerî. Çalakîya fedayî ya Zîlane çalakîyêka ke tam wext û cayê xo de ameya kerdiş a. Na çalakî tam sey çalakîyêka mîsîlleme û heyfgirewtişî virazîyaye. Çalakgerîya Zîlane gerîlatîya ke ser kewena temsîl kena.Na çalakî merg de cuya azad xelq kena. Sey ke Kemal Pîrî zî vatbî, cuya azade ancax merdim bişînbo oxirê ci de bimiro, mumkin a. 


‘Zîlane qanûnê cuya azade ya’

Derheqê çalakgerîya Zîlane de analîzê tewr hîra hetê Rayberê Şarê Kurdî Abdullah Ocalanî ra ameyî kerdiş. Ocalan Zîlane sey ‘Îlaheya Azadî’ şinase keno û vano ‘Zîlane qanûnê cuya azade ya’. Reyna vano ‘Zîlane fermandar a, ma zî bin emirê aye de yî’. Helbuke tayê vanî qey, merdim eşkeno aye taqlît û dibare bikero. Bitaybetî nê kesî hewl danî bi no hawa çalakîya rêxistinkerde ra biremî. Zîlane sey perwerdekar, rêxistineker û îdarekar vîneno. 


Xeta Zîlanan dano qezençkerdiş

Ewro xeta Zîlane teng yena girewtiş û tena hetê derbe dayîşê dişmenî de girîyena dest. Raştîya çalakîya Zîlane ke perwerde û rêxistine kena, nîno dîyayîş û nîno famkerdiş. Ewro zî çîyêko winasî lazim o. Ewro gerîlatîya Kurdistanî xeta Egîd û Zîlane de bîya artêşêk. 

Serrgêra 21. ya şehadetê Zîlane de ganî merdim hîna baş xeta çalakî û raştîya aye fam bikero. Çimkî ma prosesêko winasî de yî ke her wextî ra zêde lazimî bi vindetişê Zîlanvarî esto. Çimkî tena xeta têkoşînî yê Zîlanan, Nudayan, Nalînan û Hêlînan dano qezençkerdiş. Ewro zî ancax xeta ke faşîzmê AKP, MHP û DAIŞî têk bîşêro û şert û mercê Rayber Ocalanî baş bikero, xeta înan a. 


 NAVENDÊ XEBERAN