7’ê Hezîran’î de weçîntoxî şî ser sandiq, bi reyanê xo tercîxê xo weçînay. Netîceyê weçînayinan de tenya çihar partî kewtî meclîsî.
AKP tenya yüzde 40.8 rey girot, zaf gonî kerd vinî û binkewt. Partiya Erdoğan’î ke 400 parlamenterî kerdî hedef, tenya 258 parlamenterî girotî.
Partiya ke nê weçînayinan ra serkewtî vejya HDP ya. HDP bi girotişê yüzde 13.1 rey (6 mîlyon 58 hezar û 150) dês-bendawê se û des yê weçînayin rijna û 80 parlamenterî dekerd meclîsî miyan. HDP ya ke reyna ewil-sifte dekewt weçînayinan weçînayinan de xeylê hetan de serkewt. Sûkanê Kurdistan ra piya, sûkanê Tirkiya de zî HDP bi milyonî weçîntoxan ra rey girot.
HDP sûkanê Kurdistan de dersê do gird da AKP û AKP Kurdistan de kerd partiya tabela. Sûkanê zey; Semsûr, Dîlok, Erzêrûm, Enqera, Antalya, Kocaelî, Îzmîr û Bûrsa de qorê sifte parlamenterî vet. Sûkanê zey Colemerg, Şirnex, Agirî û Dersîm ra serva-semedê partiyanê rejîmî parlamenterî nêvejyay, nê sûkan de tenya HDP parlamenterî vet.
No serkewtişê HDP de gerek ma rolê ceniyan xo vîra nêkerê. Ceniyê ke weçînayinan de aktîf rol kaykerdî 32 parlamenterê cenî yê HDP berdî meclîs. Weçîntoxanê HDP bi vetişê 32 parlamenterê cenî herzewbîn zihnîyeta cinsîyetperwerî zî şikitî.
Netîceyanê weçînayinan xeyalanê Erdoğan’î welişna, la heta bîn ra xeyalanê şarî kerd gird. Zey ke parlamenterê HDP yê Enqera Sırrı Sürreya Önder’î zî ard ziwan; “nê weçînayinî verra herb serkewtişê haştî yê”…
Weçîntoxan mesaja ‘ser na hardî de ma endî herb nêwazenê’ day. Herzewbîn weçîntoxan ‘Erdoğan’î nêkerd serwezîr’! Cok ra badê weçînayinan ne reîs-cumhurî ra, ne zî serokwezîrê Tirkiya ra wextê derg veng nêvejya. Sermiyanê AKP yê ke netîceyan hezm nêkerdî (zey Bulent Arinç, Yalçın Akdoğan’î) zî bi hêrsê vinîkerdiş û binkewtiş weçîntoxan û HDP tehdît kerdî. Xo ra pey coy zî Amed de komployê qilerîn vistî dewre, JÎTEM û DAİŞ’ê xo dekerdî hereket.
La se kenê wa bikerê endî nêşenê nê netîceyanê weçînayin bivurnê;
Polîtîkayê herb, înkar û îmha, zihnîyetê ‘jew welat, jew ziwan, jû al, jew îttiqat’ îflas kerd.
* Peyniya dewrê derbeyan, dîktator û padîşaxan amê.
* Projeyê ‘reynayişê-xelesnayişê demokratîk û ciwyana azad’ yê Rayver Öcalan’î ame qebûlkerdin.
* Weçîntoxan ‘çarçoveyê hiqûqa wa-birabiyen’ de hardê Mezopotamya û Anatoliya de waştena ‘piya ciwyayiş’ ardî ziwan.
* Endî zihnîyetê ciyakerdişê cenî/camêrd şikiya, kêberê civaka demokratîk û azadîwaşt abiya.
Netîceyê weçînayişê 7’ê Hezîran’î hewna xeylê çî vanê, la kam senî waneno û fehmkeno!? La zey ke Erdoğan’î va; ‘Fermo Kobanê kewt-kewno’ nê bi, la tarîx şahidî keno ke AKP kewnena…