Derheqê Festîvala Xoza û Kiltûr ya Mûnzûr ke herr ser hetê şaredarîya Dersim virajîna de kombiyayiş virajîya. Hemşaredar, parlementer û temsîlkarê partîyanê sîyasî û civaka sivîl yê sûk tewrê kombiyayiş bî. Hemşaredarê Dersim Mehmet Alî Bûl’î vist vîrî ke netîceyê kombîyayiş de qerarê viraştişê kombîyayiş ame girewten.
Festîvaleke goreyê erjayenanê sûk
Bûl’î da zonayen ke derheqê nêviraştiş û îptalkerdişê ‘Konseranê stadyûmî’ de qerar ame girewten û derheqê bernameyê festîval de nî zonayişan bare kerd: “Çarçoveyê festîval de emserr panel, munaqeşeyî, atolye û zîyaretê jarê bimbarek estê.
Parlementerê HDP yê Dersim Alîcan Onlu zî da zonayene ke ganî festîval bîro virastayene û va gerek na festîval goreyê zon, kiltûr, îtiqat, tarîx, dorme û waştenanê qomî bîro virastene. Ganî festîvaleke ke ocaxanê alewîyan bîyaro têlewe bo.
Ganî ablûqa bişikîme
Onlu da zonayene ke uslûbo ke hetê derbeya seray yeno vilakerden goreyê tekoşîn nîyo û va, gerek dûştê nayî de omidî vila bikerime. Onlu hayr ant xoverdayişê şaran ser û nîya va: “Nêrazîbîyenê demokratîk ke Tirkîye û Kurdistan ra benê vila moral û omidekê gird danê ma. Gunê dûştê tometkerdenan û ablûqa Dersim de vejerime meydanan. Gunê eve tekoşîna civakî ablûqa bişikîme.
Kombîyayiş de qerar ame girewten ke her sazî û rêxistin derheqê bernameyê festîval de pêşnîyazanê xo hadre bikero, komîteyê hadrekerdiş bîro weçîntayiş, şîyara festîval ra pîya bernameyê ci bîro aşkere kerdiş. Seweta nî pêrokîn hadreyînan 22ê Hezîran de onca kombîyayiş virajîyeno.
DÎHA/DERSIM