Tirkîya de eke fetelîya, hata Sêwaz ti vana zobîna ju(yew) welat der a, uca ra dotî kuna zobîna welat. Erzingan ra dima hetê cêrî ser, ya kî hetê cepî ser şîya, no hal tayêna beno eskera. Ju welat de, muameleya di welatîjan vênena.
Hetê Erzinganî ra ke hetê Dêrsimî ser o verê xo çarna, raver şîndorê sukeya (şarîstan) Dêrsimî de, Qereqolê Mutu de raye birnenê. Verê tumî de ju nuste aseno. Nuste de vano; “Kamo ke vano ez tirk ane, xojîvê ey bo!” O waxt fam kena ke kuna (kuwna) zobîna (yewbîna) ju ca. 10 km dima (badê) Cankurtaran de zobîna ju qereqol. 5 km dima şîndorê Pulemorîye de nuqtawa polîsan. Duştê şuya ‘Koyê Çêna Arebî’ de oncîa nusteyo verên; “Kamo ke vano ez tirk ane, xojîvê ey bo!” 3 km dima Mektebo Handîya Pulemurîye de nuqtayê cendermeyan. Na nuqta de, tever de kes nêvênena. Peyê dêsan ra leşkerî zirçenê: “Sona kotî? Ça sona? Key peyser cêrena ra?” Dima persayîş ke qedîya vengo bê wucid to ra reyna vano: “Areve ra bêwar! Rae ra duba bîje, hen birame!” Areve ra yena war, çike vanê ey kena. Hama hona nêqedîno. Dima oncîya veng kenê berz zirçenê: “Areve ra bêwar, duba oncîa hurendî de rone!” Bêçare se ke vanê, ey ebe qeyde kena. Eke vatena înan ser meşêrê ya(yan) canê xo ra bena, ya kî to peyser çarnenê, miradê xo anê hure. Naca ra tepîya kî rehet nêkena. Rae ra qirfîna, asfalt ra kuna sitabîlîze. Ortê awe û lîme(çamire) ra xo xelesnena. 15 km dima Pirdosûr de qereqol, 20 km dima verê tavela Qisle de qereqol. Şîndorê mîyanê Dêrsimî de nuqtayê polîsan de to oncîya vindarnenê. Raver qayîtê bar(bagaj) kenê, tenê ke sona qayitê nasname kenê. Raa Pêrtage ser de; “Amadeyîme, qewetinîme, komando.” Ferîbota Pêrtagê ver nuqtayê cendermeyan. Raa Madenî de; “Ju dewlete, ju milet, ju bayraxe, kam ke vano ez tirk ane, xojîvê ey bo…” Endî hetê cêrî ser, ê bînan mêvajîne. Çike eke pêroyîne binusnîne hen zanen ke no nuste nêqedîno! ‘Gundê bêtêkewtişî’ de ju qanûn ra nê nusteyê azperestîye û cengî bî qedexe. Çi hêf ke hata na saete kî hona her çî hurendî der o. Ewro fekê serekwezîr ra; “Ju dewlete, ju milet, ju bayraxe, kam ke vano ez tirk ane, xojîvê ey bo!” roze war nêgineno. Yanê mala ma de teyna serrî vurînê!
Dewlete ewro gereke xo ra tayê persan, pers bikero: Rojakewten(rojhelat) ra, vajîme Sêwaz ra juyî ke bişêro Îzmîr, çîyê nîyanenî ça nêvêneno? Nîya jê(sey) mehteran ju game ver, di game peyser eştene ra demoqrasî amo kotî ke bêro Tirkîya? Dewletan tarîx ra derse ke nêgurete, tarîx her dem xo reyna (defêna) keno aktuel, hama ju cumla qe(qet) nêvurîna: “Ê yê ke besenêkenê îlim ra îdare bikerê, zulim ra îdare kenê!” Kamilîya(tecruba) dîna, na kî kerda eskera; zulimkarî rew bo herey bo dîna ra bar kenê sonê, peyê xo de teyna mêraso naletin ca verdanê.