DÎCLE EHMED - ANHA/KOBANÊ Şorişê Rojawanî ke game bi game awan beno û xeylê şaranê Rojhelatê Mîyanênî û dinya rê beno nimûne, saya şehîdanê qehremanan de ewro cuyêka alternatîfe pêşkêşê dinya keno. Bi hezaran qehremanan ra yewe zî Feysel Ebû Leyla yo. Feysel Ebû Leyla wextê tewr giran yê şerî de rayberîye kerd û têkoşînê azadîye de cayê xo girewt. Bitaybetî azadbîyayîşê bajarê Kobanê û Minbicî de rolêko aktîf girewt. Feysel Ebû Leyla bi vindetiş û xoverdayîşê xo bi sembolê têkoşînî û 5ê Hezîrana 2016î de resa şehadet û vizêr serrgêra şehadetê ci bî. Babete ser o birayê Ebû Leylayî Ferhad Sadûnî dîyar kerd ke amancê Şehîd Ebû Leylayî azadkerdişê Minbicî bi û va ‘Ewro ewja de amancê ey pê yeno’. Bawerîya Ebû Leylayî gird bîye Verfekê Meclîsê Leşkerî yê Minbicî Şervan Derwîşî zî va ‘ma rojanê tewr manayinan yê xoverdayîşê Kobanê bi Ebû Leylayî reyde derbaz kerd’ û wina va: “Bawerîyêka girde ya Ebû Leylayî estbî. Ey hertim vatêne ‘serkewtişê Kobanê do bibo bingeyê serkewtişê Minbic û Rojawanê Kurdistanî’. Ebû Leyla bi îradeyêko gird şer kerdêne û zaf waştêne ameyeyêko azade yê domananê Sûrîye bivîno.” Cinîya Ebû Leylayî Dîcle Ehmede daye zanayîş ke aye têkoşînê mêrdeyê xo baş fam kena û wina va: “Ebû Leylayî hertim mi ra vatêne ‘ti do rojêk têkoşînê mi fam bikera, ez nê têkoşînî seba şima û heme şaran dana’.”