Her çiqas ke serranê 90î ra nata hukmatî bêrî bedilnayîş zî polîtîkayê asîmîlasyonî heta nika qet nêbedilîyayî. Dewlete tarîx ra nata bi qetilkerdiş û qirkerdişan nêeşka şarê kurdî bêqedêna. Dewlete nika şaro ke bi qetilkerdişan nêeşka çinî bikera, wazena ke bi polîtikayê lişîn, fihuş, îstîsmaro cînsel û tiryakî biqedêna. Nê polîtîkayî heme parçeyê Kurdistanî de yenê ramitiş. Nê cayan ra yewe zî bajarê Amedî yo.
Yeno îdîakerdiş ke cinî û domanê ke taxa Ben û Senî ya qezaya Yenîşehîrî de cuyenî, keyeyê rijnaye de raştê hêrişo cînsel yenê. Babete ser o cinîyê taxe qisey kerdî û nêwaştî ke nameyê înan bêro zanayîş. Heto bîn ra zî destur nêdayî ke fotografê înan bêro antiş.
Kesê sîlehin yenê
Cinîyê taxe qiseykerdişê xo de wina vatî: “Keyeyê vengan de fihuş û îstîsmaro cînsel yeno kerdiş. Ma seba çareserî muracatê îdarekaran kerd. La heta nika ti cewab nêdayî. Ma nêewtanenê ke domananê xo bierşawî teber. Keyeyê vengan de şuşe û xeylê çîyî estî. Ma domananê xo keye de hepis kerd. Wexto ke beno şewe şîyayîş û ameyîşî zêde benî û kesê sîlahinî tîya de gêrenî. Ma zaf reyan bîyî şahid ke nê kesê sîlehinî doman û cinîyan bi zorî anê. Wexto ke tiryak gênî zî vengê qîrayîşan yeno.”
Cinîyê taxe tewr peynî wina vatî: “Êdî ma tersenê. Wa îdarekarî vengê ma bieşnawî. Ganî şaredarî nê keyeyan birijno. Ma nêzanê ke nê keyeyî aydê kamî yî. Taxa ma verê wina nêbî. Eke çareserî nêro dîyayîş do tîya bibo taxa sucî. Kesê ke yenê taxe heme zî xerîb î. Ciwanê taxa ma nîyî. Wazenê ke tax û komela ma bixerepnî.”
ŞÛJIN/AMED