ŞOREŞ BENEK / ROJNEWS / SILÊMANÎ
Rayberê Şarê Kurdî Abdullah Ocalan 15ê Sibata 1999î ra nata tecrîdêko giran reyde têrî yo û no tecrîd serranê peyênan de hîna zaf giran bîyo. Ocalan 27ê Temmuza 2011î ra nata avûkat, 11ê Êlula 2016î ra nata keye û 5ê Nîsana 2015î ra nata zî Heyetê Îmrali reyde pêvînayîş nêkerdo.
Hemserekê Cepheyê Şarî yê Demokratîke û Endamê Komîteya Ocalan rê Azadîye Kamuran Berwarîyî babete ser o qisey kerd û derheqê pêşnîyazê çareserîye de vînayîşê xo pare kerd. Berwarîyî va ‘Ocalan mîmarê aştîya Rojhelatê Mîyanênî yo’ û wina domna: “Cok ra ganî seba azadîya ey zî têkoşînêko gird bêro dayene. Fikrê Ocalanî nêbî, herême de huzir nêbeno. Seba ke dewleta tirkî fikrê Ocalanî ra tersena, wazena têkilîya şar û Ocalanî yewbînan ra biqerfna.”
Berwarîyî dewamê qiseykerdişê xo de wina va: “Seba ke tecrîd bêro wedarnayene, ganî CPT wezîfeyê xo bica bîyaro. Ewro yê ke tecrîdî kûr kenî, suc kenî. Ganî tecrîd bêro wedarnayene û Ocalan azade bibo. Rêxistinê heqê merdiman wezîfeyê xo Kurdistan û Rojhelato Mîyanên de bica nêanî. Çimkî nê rêxistinî girêdayeyê dewlete û îsîtxbaratê xo yî. Reyna eke CPT nêşêno Ocalanî bipawo, o wext heqê çi paweno? Ganî CPT tewr tay aşme de reyêk Ocalanî reyde pêvînayîş bikero.”