Festîvala Dersim ke bi şîyara “Qirkerdişê xoza, kamî, îtiqat û kulturî rê nê” yena organîzekerdiş, mavêna 2 û 3ê Hezîran de sûka Almanya Frankfûrt de virazîyena. Festîvala ke hetê FEDA, FDG, ADEF organîzekerden, do 2ê Hezîran de Meydanê Rebstockpark de, bi Panelê “Pencike qirkerdişî de Dersim” destpa bikero. Komîteyê amadekarî yê festîval aşkere kerd ke, pêrokîn amadekarîye festîval temam bîye û şarî silayîyê festîval kerd.
Komîteyê amadekar da zonayen ke, kesê ke wazenê festîval de stand akerê êşkenê heta 31ê Gulane serpirodayîş bikerê. Komîteyî vist vîrî ke, ganî standî bi meqsedê bazirganîye nêbê, tenya standê çarçoveyê kultur, huner, perwerde û polîtîk rê do destûr bîro dayen. Emserr zî domanî nêamey vîra kerden. Seba domanan do Pedagog û perwerdekarê domanan wezîfe bigîrê. Herzewbîn do cayê kayîkerdişî ronîyê. Merasîmê veyveyê Dersim do emserr zî dewam bikero.
Wextê yewîye yo
Hemseroka Federasyonê Alewîyê Demokratîk (FEDA) Bedrana Yildirim vengê tewrbîyayîşî da û va, “Vera zilm û polîtîkayanê asîmîlasyon û çinkerdişî yê zaliman, rayîra Seyîd Riza de biresime têhet.”
Serokê Federasyonê Komeleyanê Dersim yê Awrûpa (FDG) Metîn Bozdag’î zî vist vîrî ke cografyaya Dersim, Osmanîyan ra nata, bi şiklê weşî û bi îtiqatê xo, ebe zihnîyetê yewperestî ra nêbî yew. Bozdag’î dîyar kerd ke bi no sebebî Dersim her tim hedefê hêrîşanê barbarîye de bi û veng da pêrokîn Dersimijê ke dîaspora de cuwîyenê ke tewrê festîval bibê û hemverê kerdenanê antî demokratîk û hêrîşan mesajê yewîye bidê.
‘Wezîfeyêko bimbarek o’
Ser nameyê Hereketê Cinîyan ê Kurd yê Almanya (YJK-E) zî Ayten Sunger qisey kerd û veng da cinîyanê Dersim û pêrokîn Dersimijan ke, bê ke dejanê demo vîyarte xo vîra bikerê, bi sereberzî ver bi ameyoxî gamî bierzê. Sunger va, nayî ra sifte zey cinîyê Dersim wayîrvejyayîşê têkoşînê Hereketê Serbestî yê Cinîyanê Kurd, bi no ruhî tewrbîyayîşê festîval wezîfeyêko bi rûmetî û bimbarek o.
Vera kanperestî yew vindertiş o
Îdarekarê Federasyonê Yewîye Dersim yê Awrûpa (ADEF) Kazim Koç’î da zonayen ke bi ruhê yewîye organîzekerdenê Festîvala Kultur yê Dersim, vera plananê kanperest yew vindertiş o. Koçî veng da pêrokîn Dersimijan û dostanê ci ke tewrê festîval bibê.
Ayten Şîmşîr zî ser nameyê Meclîsê Cinîyanê Alewîyan hayr ant muhîmîya kultur, ziwan û îtiqatî ser û pêrokîn Kurdistanijan silayîyê festîval kerd. Komeleya Dûştê Qirkerdişî yê Dersim ra Alî Guler’î zî Dersimijan silayîyê festîval kerd.
Bernameyê festîvale
Qiseykerdoxê zey; Alîcan Onlu, Hatîp Dîcle, M.Fatîh Maçoglû, Tekîn Turkel, Metîn Bozdag, Muharrem Erdogan, Bedrana Yildirim, Ahmet Balkis, Bariş Yildirim, Demîr Çelîk, Andrej Hunko, Dîmîtrîos Konstantînîdîs dê tewrê festîval bibê.
Kom û hunermendê Dengê Xwezayê, Grup Mûnzûr, Gulseren Kiliç, Ûmût Altinçag, Hasan Saglam, Yekşa, Kadrî Karagoz, Hasan Alî û Grûp Sîmûrg dê festîval de bivejyê ser sehne.
Adrese: Rebstockpark, Am Römerhof 9, 60486 Frankfurt a.M.
FRANKFÛRT