Newroza 2017î ke do fînalê aye Amed de bêra viraştiş, amadekarîya peynî ya yena kerdiş. Sereka Komîteya Amadekare ya Newroze Ruken Akçaye wina va: “Ma do warê Newroze ra destpêkerdişêko newe biqîrî."
Emser adirê Newroze bi rayberîya Partîya Herêman ya Demokratîke (DBP) û Partîya Şaran ya Demokratîke (HDP) de 33 merkezanê cîya-cîyan de yeno tavistiş. Newroza Amedî ke her serre bi hawayo rengin û hîra yena pîrozkerdiş, emser zî amadekarîyê peyên yê Newroze yenî kerdiş. Heta nika seba Newroze 400 hezar vilawekî ameyî vilakerdiş û warê Newroze de zî amadekarî resayî merhaleyo peyên. Nika xemilnayîşê dorme û sehne domîyeno. Newroza fînalî de hunermendê sey Yaşar Kurt, Koma Pel, Grup Munzur, Koroya Jinên Amedî, Dengbêjê Botanî û Ferhat Mansurî do bivejyî sehne.
Programêko hîra
Heto bîn ra Hemsereka KCDyî Leyla Guvene, Ahmet Turk, Verfekê Grûba HDPyî û Parlamenterê HDPyî yê Amedî Osman Baydemîr, Hemverfekê Kongreya Demokratîke ya Şaran (HDK) Onur Hamzaoglu, Aktîvîsta Tevgerê Cinîyanê Azade (TJA) Ayşe Gokkane û dayîkêka aştîye sey qiseykerdox do bivejyî sehne.
367 rojnamegeran rê akredîte
Reyna yeno pawitiş ke hunermend, roşnvîr, nuştox û akademîsyenê ke ameyî dawetkerdiş beşdarê Newroze bibî. Hetê ci de Partîyê CHP, DSP, Partîya Saadetî, Partîya Kede (EMEP) û partîyanê kurdan ra xeylê temsîlkarê rêxistinê komelî yê sîvîlî do beşdarê pîrozkerdişan bibî. Heto bîn ra kesê ke welatanê Ewropa û Başûrê Kurdistanî ra ameyî dawetkerdiş zî do cayê xo protokol de bigirî. 163ê ci xerîb pêro pîya 367 rojnamegeran rê akredîte ameyo dayîş.
Wa tewr bibî
Sereka Komîteya Amadekare ya Newroze Ruken Akçaye derheqê amadekarîyan de va ‘her çiqas ke qedexe û astengî estbîy zî ma 400 hezar vilawekan vila kerd’ û wina domnaye: “Ma çar hetanê welatî de bîlboard û pankartî aliqnayî. Ma do warê Newroze ra destpêkêko newe biqîrî. Ganî şarê ma her ca ra biherîkîyo warê Newroze. Ganî ma bi şarê xo bi hawayo bihêz mesajê aştî û destpêkerdişêko newe bidî.”
DÎHABER/AMED