Seba yewîya neteweyî û viraştişê Kongreya Neteweyî bi serran o hewldayenê KNK û Hereketê Serbestîye Kurd ramenê. Endamê KNK ke xebatê yewîya kurdan newe ra ganî kerd, aşkere kenê ke rixmê tayî astengîyan û polîtîkayanê şaş yê tayî partîyan zî reyna seba yewîye omid esto. Goreyê zanayîşanê endamanê KNK pêdîyayîşan de vejyayo orte ke seba ronayîşê platformekê ortax şert û mercî guncaw ê û partîyanê sîyasî zî reaksîyonê pozîtîf damûsnayê.
Kongreya Neteweyî ya Kurdistanê (KNK), ke seba ronayîşê platformê qiseyan ya ser Kongreya Neteweyî 12'ê Hezîran de Silêmanîye de kombîyayîşeke çapemenî viraşt, temasanê xo yê partîyanê sîyasî reyde ramena.
Bi xeylê partîyan ra ronişt
Heyetê KNK ke Yardimkarê Hemserokanê KNK Tahîr Kemalîzade, endamê Dîwana KNK Dr. Kamûran Berwarî, Perwîn Ezîz, Farûk Cemîl, endamê KNK Seyîd Ekrem, Ferhat Dostkî û Şikrûllah Hemed Emîn ra ca yeno, verîya hefteyekê Başûrê Kurdistan de destpê pêdîyayîşanê bi partîyanê sîyasî kerd. Heyetî bi partîyanê YNK, Hereketê Goran, Partî Îslamî Komala, Partî Demokratî Kurdistan, Partîya Kedkaranê Kurdistan, Yekgirtû Îslamî, Partîya Komunîst ê Kurdistan û Bizûtneweyî Îslamî ra pêdîyayîşan viraşt. Herzewbîn heyet Hardê Pawitenê Medya de zî bi sermîyananê KCK ra ronişt.
Dê bi temsîlkaranê leteyan ra
bîrê têhet
Badê kombîyayîşê partîyanê sîyasî û quwetanê civakî yê Başûrê Kurdistanî, heyetê KNK do rojanê vernî de zî bi partîyanê sîyasî û dînamîkanê civakî yê Rojhelat, Rojawa û Bakurê Kurdistanî ra zî bîro têhet.
Heyeto ke ser hewldayen û plansazîya xo zanayîşî day ANF nê detayan day: “Pêdîyayîşan de reaksîyoneke pozîtîf vejyayo orte. Krîza Sûrîye, yê Qatar, hewldayenê Îran yê seba ferzkerdişê hukmê xo, xewn û xeyalê neo-Osmanîyan yê Tirkîye, referandûma xoserî yê Başûrê Kurdistan û talokeyê çar parçeyê Kurdistanî bîyê sebep ke Kongreyê Neteweyî bîyarê rojdem û qisey bikerê.
Aşma Tîrmeh de do kombîyayîş virazîyo
Goreyê zanayîşê ke çimeyanê KNK ra amey girewten, rîwalê tayî şert û mercan û pêdîyayîşê Awropa ra dima, ê plan kenê ke aşma Tîrmehî de platformeke qiseykerdişê 'stratejîya Kurdistan, yewîya neteweyî, Kongreya Neteweyî' bi tewrbîyayîşê temsîlanê partîyanê sîyasî, roşnbîr, akademîsyen, rojnamevan, rîspî, alimê dînî û temsîlkaranê odeyê pîşeyî, ronê. Yeno pawiten ke no platform 350-400 delegeyan ra ca bîro û bi ronayîşê komîteyan ra seba viraştişê Kongreya Neteweyî konferans virazê û na çarçove de kar bikerê.
Rixmê ceribnayîşê serra 2013ê û estbîyayîşê tayî nakokîyanê mavênê tayî partîyanê Kurdan, atmosferê sîyasî û leşkerî yê Rojhelatê Mîyanên, viraştişê kongre û yewîya neteweyî ser Kurdan ferz keno.
Sermîyananê KNK, hayr antî ser na xisûsîyetî û aşkere kerdî ke, ê wazenê hêzê sîyasî yê Kurd dormeyê xala ortax, yanî Kurdistan de bîrê têhet.
Vizêr zî heyetê KNK, Hewlêr de bi temsîlkaranê Bizûtneweyî Demokrasî Gelê Kurdistan û Partîya Yekîtiya Neteweyî ya Kurdistanê (YNDK) ra ame pêhet û ser yewîye qisey kerd.
ANF/HEWLÊR